فوق رأي

منقول بالحيطة
هناء إبراهيم

تقول حبوبة جيرانا: كل المغتربين (من الجنسيات الأخرى) الذين قابلتهم في حياتي سواء في أمريكا أو في بيروت أو هنا.. تجد أن الواحد منهم لديه خطة اغتراب معينة مع البدائل في حال جد جديد.. أي أنه عارف مغترب ليه وقدر كم تقريباً ولما يرجع برجع بمشروعه الخاص حسب خبرته ورأس ماله واضعاً عدة احتمالات وعدة حلول في  حالة تعسر (الموضوع)..

وتضيف: إلا ناسنا الكرما الكرام (ناس أما الآن) يغتربوا ساي ويمشوا يقعدوا قبلن ويجدعوا حصاد الغربة في الصقيعة ويجوا بهدايا للناس وخفي..     حنين دا كان جوا طبعاً..
وهي تعتقد أن المغترب إذا تم سنتين وما جاء إجازة (قلبو بقوى) وتاني ما بجي بي هين وإذا قعد خمس سنوات وما جاتو فكرة رجعة وتأسيس مشروع خاص، معناها ما عارف روحو بعمل في شنو..
وتعليقاً على الرسوم التي فرضتها المملكة العربية السعودية وضعت حبوبة جيرانا فنجان قهوتها ثم قالت: وقت تمشي لي ناس في بيتهم وانت قاعد كدا تجي بتهم الطويلة أم عصيبات ديك (تقش الواطة) وتفرش ملاية السرير الانت قاعد فيهو.. ما ياها طردتك؟!
هو الطرد دا إلا يقول ليك أمشي أهلك دايرين ننوم؟!
يلا السعودية بطريقة ما قالت للناس أمشوا أهلكم (دايرين نقوم.. دايرين نشتغل)..
دايرة ناسا ديل يعملوا حاجة.. طيب نحن المزعلنا شنو نان؟!
عينا لفيل بلدنا نطعن في ضل الناس؟!
أقول قولي هذا نقلاً عن حبوبة جيرانا
و…….
باقي كلام
لدواعٍ في بالي