فوق رأي

هاشتاق آخر الأسبوع
هناء ابراهيم
#أكثر حاجة موجودة بشوارع العاصمة هذه الأيام غير ملصقات حفلات رأس السنة، هي كلمة إزالة الواقفة مع السيد إكس بكل مكان.
إن لم تجد الكلمة سوف تجد الإزالة شخصياً، أي تم التنفيذ بعد مرور(24)  ساعة من الكتابة.
تعاين يمين تلقى إزالة، تعاين شمال تلقى إزالة، باقي بس نعاين فوق نلقاهم كاتبين إزالة في السماء.
والله جد..
#السيد (روبرت واطسون) مخترع الرادار بصورته الحديثة وأحد أهم مطوريه، تم تحرير مخالفة مرورية له باستخدام الرادار، وذلك عندما تجاوز السرعة المحددة.
عُرف عن روبرت أنه كان يقول دائماً: يا إلهي، لو كنت أعلم فيما سيستخدمونه ما كنت اخترعته قط..
البتسوي بي إيدك يا عمو روبرت..
على فكرة في ناس كتار طالبنك حياً أو ميتاً..
#حبوبة جيرانا مستغربة جداً من البنت التي تضع بحفل زفافها أغنية أسعد واحدة للفنانة أليسا) الفرحة الأنا فيها دي كلها ترجع ليك(.
ومن ضمن أسئلة حبوبة جيرانا الاستنكارية:
ترجع ليهو؟!
طيب بالنسبة لأمك وأبوك والصرف والتعب والنيولوك وكريمات ما قبل العريس؟
بالنسبة لأختك المسكينة وبنات خالاتك وصحباتك القصن ضهرن مع الضيوف..
بالنسبة لأهلك الجايين من سقط لقط ريفي التوج وحيلن مهدود.
بالنسبة لريان وسلافة البساسقن معاك من سوق لسوق ومن أستديو لبيوتي سنتر..
وبالنسبة لشهد عدلان وجويل.
بالنسبة لإنصاف مدني وهدى عربي.
ترجع ليهو يا مفترية؟!
#انت ما  ليك دعوه بيا
لا صغيرة علي غرامك
لا كبير الحب عليّا
…
سيبني أهلك كان هلكت
فيك عاجبني الهلاك
قلبي صاح في الريد أناني
مافي زول في الحب ملاك
لازم أتجنن شوية
ومرة أتفاهم معاك
مرة أهديك ريدي كلو
ومرة أتجنب لقاك
عادي أرضيك بي عيوني
وعادي أتشاكل معاك
يعني ممكن أجيك فجأة
وأشكي لعينيك عيوني
إنو قاعدة تشوف جمالك
وما بترضى تشوف شجوني
وممكن ألقاك مرة تاني
وأشكي لعيني عيونك
إنو حلوة
وفيها إحساس مافي زيو
وإنو ما بتكون بدونك
يعني ممكن أنادي ليك
وانت واقف جنب فؤادي
ممكن أتونس هواك
وانت في ضفة بُعادي
ياخي ما تضحك عليّا
وبرضو ما ليك دعوه بيّا
# من جماليات العام الماضي انضامي لأسرة) المجهر(، ومن جماليات الحياة تشكيلة الأحزان والأفراح الأمل والجراح فالحمد لله على كل الأحوال.
#وكل عام وأنتم بخير .