وطن ..فنان
إذا طهر العشق بقى ليك وجب غسل الجسد بالضَّي
وإذا ضل المقيل عينيك فرض تتوقى بي عيني
و إذا كان العلاج عندك فمرحبتين حباب الكي
وإذا زرعك نبت في الجوف شنو الما ببقى فوقي الصي
مطر أمنك خريف قلباً معوّد يومي يحصد خوف
سحاباتك تبل عِرق العطش في الجوف
و مرحبتين حبابو عماي إذا ما كنت إنت الشوف
وإذا ما كنت نبض الروح
دوا الجرح النبت في الدوف
فلو تأذن
بدور أسأل
منو الأداك تذاكر رجعة الزهر الكسا هو الطل؟
منو الخلاكَ بين أشعار تجاوب لما تسأل هل؟
يجوز أهديك رزاز
غنوات مربّطة احتمال الحل ؟
إذا كان الجواب ممكن
منوالخلاكَ فينا وطن؟
ملان إيمان من الفاضي و معبأ من المسافة سكن
منو الغناك وبيك رطن؟
منو السندك علي ضهر الزمان الشوم ملاك محن؟
منو السكبك عقاباتك؟
منو الرفعك غنا ودوباي بعطر فيض مساحاتك ؟
منو الدلاني لي أرضك عشان أسكن مساماتك؟
منو الختاك في ذاتي وملاني صبابة من ذاتك؟
بدور تفتح عويناتك
تلاقي الأولياء الصُلّاح تلاقي عقاب وليداتك
بدور تتوكأ إيماني وتمِش تفقد حواشاتك
تشيل سلوكة تتقدّم تزغرد رغم آهاتك
تتيرب في خلا الأيام
ينقط فيك سما الآلام
عَرق ورق الغنا الكلام
بدور تتسقى من عيني وكت تنزف جراحاتك
بدورك يا وطن شامخ تسِنْد الحيل إذا ما مات
بدورك تنزفك ذاتي وتداوي نزيف جراح الذات
بدورك يوم فرح عمرك تبشّر برة للجنيات
بدورك يوم صلاة العيد تبارك العيد علي الأمات
بدورك حي
بدورك حي
إذا نوسر فتق أحشاي نبض صمت الجراح الني
وإذا ماتت معاني النور بدورك تبقى ليّ الضي
تلتّق توب حجا الحبوبة يوم حنة مليح الزي
فلا تنداح
لا ما تنداح إذا فتق الزمن دُلقان هديماتك
و لا تيأس إذا طوّل ضلام الليل مناحاتك
إذا غابت صباحاتك
و إذا نزفت جراحاتك
أنحن إيانا جنياتك
وإذا سُرّيقتي انهدّت ملت أشلاء مساحاتك
فلا تنهار
ولا تحرق إذا ولّع صميم قلب المواجع نار
ولا تعفانا لا نعفاك لي زمنا جزاهو التار
وصبِّر سمك آ المريود إذا اتقولب عليك و فار
وما تندم
لا ما تندم
فداك يا غالي إنت الدم
فداك صوت الغنا الغنّاي
فداك قلبي و مجاري دماي
فداك خط القلم والناي
منو القال إنت حمل الهم
شنو البشبه وجيهك غير قعاد البن و جر النم
وحاتك يا وطن حاشاك
مثبّت في مسارب الجوف إذا كتر الصبر لاشاك
مكتّم بين عروق الزول إذا ما حاول اتناساك
و شوقو بسوقو ليك غصب إذا ما صابحك … ماساك
أقيف شخبط علينا هواك
ووسّم فينا أي وريد عشان يحفظ حروف مغناك
وسوق غيمك علي كل حر بتطعن بي قفاها قفاك
وشِد قلب الكتابة سرج يقيف في السكة يتلقاك
وتلقى الريدة بين إيدَي
إذا فارقتك أسي أجيك سمات اللهفة في عيني
وختم اللهفة في شخصي وصفات اللوعة شاهدة علَي
هدايتي علي أضان زمنا مدسدس في مسام الغي
و إذا فرضك صلاة الشوق
بشد أوتار عصب حسك وأتاجر بي قواي في السوق
عشان أتوسد إحساسي وأراهن بي قلب مسروق
وأكورك ….قلبي ليك بالدييييييين
مسام الغنوة والإيقاع مجابهة الزمان الشين
نبض قلب العشق .. والعين
فرح موسم عديلة و زين
ببيعو قصادي بالمجان
وما خسران ولا خسران
عشانك إنت يا وطنا بصد جيب الفلس مليان
و شيل طوريتك اتوكل علي مطر الأسى الرويان
علي ناسا بتاكل اللقمة واسوق الأنين الحان
وراضية عشان تبيع الفرحة في أسواق شقا الأحزان
بتستخسر مروق الروح بدونك وتشتهي الحرمان
وطن مبدع وطن فنان
وطن بي قامة الإنسان
وطن كفت خدود الجوع وعى وكان الفقر سكران
وطن إيمان
فما قولك ..؟
وما قولك؟
إذا سكن البكم صمتي و مضغ حس الزمن حولك
وما قولك
إذا سلب القصر طولي ووقفت أشابي لي طولك
وما قولك إذا صنقع خريف غيمك
نكت بطن الزمن غولك
وإذا دمي
و أبوي أمي
وأنا وعمي
غناي وبكاي
هناي وشقاي
هواي ودماي
أناي وسواي
صِبح كل النضم هولك
فما قولك
وطن مبدع وطن فنان
وطن بي قامة الإنسان
وطن كفّت خدود الجوع
وعى وكان الفقر سكران
وطن إيمان
فما قولك ؟