فوق رأي
هاشتاق آخر الأسبوع
هناء إبراهيم
#الشوق يا سيدي يجعلنا على أهبة الاستعداد.. قيد الترقب لعل الأيام تأتينا منك بنبأ عظيم..
هذا وقد أكل الشوق من قلبي وشرب
……..
#بعض الحكايات إن لم نضع عليها الشمع الأحمر سوف تفتح على قلوبنا جحيم الذكريات..
حكايات لا تحتمل حِيلة الباب الموارب..
……
#الناس البزعلوا منك عشان إنت زعلان منهم، هؤلاء مصابون بحول لذيذ جداً..
والله جد
…..
#في فترة من حياتك بتحس إنك عايش في أسوأ نسخة من شخصيتك.. وإنو أمورك مع نفسك جايطة جداً وإنك محتاج طبيب نفسي.. لكنك لن تعالج هذه النسخة ولن تذهب إلى طبيب نفسي كون هذه المرحلة مرحلة لا مبالاة و(ما حنك).
…….
#التلميح فن يجيده البعض.. مواهب فردية يعني.. فلو ما عندك الموهبة دي، أدخل في الموضوع مباشرةً الله يرضى عليك.
……
#عاملت مشاعري معاملة الأسرى.. أطلقت سراحها بعد معاهدة حُب وسلام… فحملتها رياح الحرية بعيداً..
هذه المعاهدة جعلتني أنزف وأنسف حياتي..
…..
#علينا الاعتراف أن هناك اختراعات (بوظتنا) كما بوظت بعض الأكلات النظام الغذائي الصحي للبني آدمين.
……
#انتبه لهذا المشهد من أغنية (حيرت قلبي معاك) حين يقول:
أخفي الدموع عنك وأضحك أمام عينيك
وتفيض عيوني حنان لمن تعاين ليك
أصلو العيون حاباك
حيرت قلبي معاك
تقريباً الزول البعمل كدا.. دا أكتر زول بتجرح في حياتو
اللحن في الغنية دي بنقط حُب..
والله جد..
وقطعت حبل الود
الكان زمان موصول
يا حبي ما أقساك
حيرت قلبي معاك
