مقولات الأمهات (2)

هناء إبراهيم

(طِير من وشي)
هذا يعني أن الزهج الآن مشغول بتحضر ماجستير داخلها..
نسأل الله العافية والسلامة
(أريتك يايمة ما ود فلانة)
هذه الجملة جريمة درجة أولى
والله جد…
(أطير أنا أخلى ليكم البيت دا)
 تعمل ليكم شنو طيب… عذبتوها عذاب
(يتب ليك ضنب)
يا ساتر يارب
(قاعدين في البيت دا ضيوف بس)
عودتوهم على هذا…
(دا يلطخوا بي دا)
يعني واحد نافع مافي.
(رسلوا رسل ضنبو)
ليه لما يرسلوك بترسل أخوك الصغير؟!.
حقارة منك مثلاً..
(يرضرض عضامك)
مبدئياً ما في علاج مجاني والكلام دا.. أقسم بالله بتدفعوا قروش المستشفى أنتوا ديل.. وبتحرسي إنتِ دي وتشيلي وتختي براك.. وأضربي عذابك دا في (70) .
كلمتك والله..
(تزاول من ضُلك)
بقولوا ولدك مجنون.
(بطلتا وفترتا أنا من طلباتكم دي)
طيب أرفقوا التعب بالصبر ولكم الأجر.
(شوفوا ليكم أم تانية غيري)
أم تانية كيف يعني؟! قصدك يشوفوا عروس لأبوهم؟!
الكلام دا بضرك براك..
(أنا الله ابتلاني بي دلاية)
جمع دلاهة
(تعب الداية وخسارة السماية)
شكراً شكراً
(ولادة النجيهة)
(الواحد فيكم بعتمد على نفسو متين)
الله أعلم
(بيت الجدري ولا بيت النقري)
نسأل الله السلامة
مرفق احترامي وتقديري ونواصل بإذن الله.