فوق رأي

الناس ديل
هناء إبراهيم

البزرعوا طاقة إيجابية في كل قلب وكل مكان وبسقوا الزهور وبحسوا بيك..
الـ لما تقعد معاهم بتحس إنك قاعد مع دماغ VIP
وأنك مصاب بنشاط فكري عجيب..
الـ لما يلقوا منشور فاهم في الفيسبوك، بعملوا ليك (تاق) وبعزموك جمال وابتسامة وفهم.
لما تزهج بخلقوا ليك مليون برنامج… ببقوا ضحكة وببقوا نادي.
الـ شِدّة ما سمحين بتعمل ليهم Unfollow
عشان ما يعملوا ليك نفسيات.
العندهم سلام داخلي عظيم.. ولما يغلطوا بعتذروا.
لما تسمع أغنية حلوة بتكون عايزهم يسمعوها معاك، عشان تبقى أحلى أكتر.
بخففوا عليك همك ولما تشوفهم بتشوف كيلو الطماطم بجنيه ورطل السكر بجنيهين.
روحهم قريبة لروحك..
الـ بدعوا ليك في ظهر الغيب وبتمنوا ليك الخير.
لما تفرح بتلقى عيونهم فرحانة معاك..
انت جنبهم ما بتعاين لتلفونك ولا بتجيب خبرو ولو شلتو وفتحتو بتلقى النت سريييع والدنيا حلوة وأي حاجة.
بضوا ليك.. بمعنى الكلمة.
لو جاتك رسالة منهم قلبك بصفق، ويرقص ويغني.
الناس الـ لما تتصل عليك، الحظ بدخل انتظار وبنتظرك.
الـ طالما قاعدين في حياتك بتظل مطمئن وكويس وحاس إنو عندك سند..
مهما كانت حياتك مسيخة بتطعم بيهم.
متخصصون في سعادة حياتك.
الناس البعقدوا الجمال من نفسو.
بفهموا صمتك وكلامك ووحدتك وزعلك.
بعرفوا متين يمزحوا معاك ومتين يكونوا جد.
الـ ببدلوا مزاجك من أسوأ لـ أروع.
الناس البتحترمك وتعزك وتفاجأك بحاجات تجنن.
بهتموا بيك وبسألوا عنك وعليك.
ممكن يكون الناس ديل ما موجودين في حياتك، بس على سبيل الأمل ودعم الذات لازم تقتنع بوجودهم.
إنهم الناس الـ (واو)
الواو هنا حرف جمال باذخ ودلالة خير.
عكسهم (الناس الباء) بزعلوك، ببكوك، بسلوا عينك، بجيبوا ليك الضغط، بعسموا روحك، بحرشوا ليك الكلاب والاكتئاب.
و……
هسه شربنا الشاي