فوق راى

قطع الأرحام الإلكترونية
هناء إبراهيم
 
ظهر قبل فترة ما أسميته (أنساب إلكترونية) وهي الآن مهددة بالتفكك حسب ارتفاع أسعار خدمات الإنترنت.
ثمة شخص أنت ابنه وهو ولي أمرك  في الفيسوك يمارس عليك كافة السلطات من المراسيل لحدي اتخمد نوم، يطلب منك على سبيل المثال أن (أمشي شوف لايك عمك عبد العزيز دا الحصل عليهو شنو).
وإن وجدك بأحد تطبيقات الألعاب الفارغة زجرك كي تقرأ وتراجع دروسك لأنو وراك امتحانات، وهو في الواقع لو لاقاك في الشارع ما بعرفك..
والله جد.
ويحدث أن تجد اثنين من أصدقائك يديرون موسوعة خلاف وشكلة من الدرجة الأولى على تويتر، في ذات اللحظة التي تشاهدهم فيها يتبادلون الضحكات والمرح في قروب الواتساب، تستغرب فتسألهم ألستم من يتبادل اللكمات الآن على تويتر، فجيبك أحدهم (ياخ دا ما بهناك ياخ)..
طبعاً هناك فرق بين شخصيتهم التويترية وشخصيتهم الواتسابية.
بلخبط مالي أنا؟!
  يستلمك رسائل وونسات منذ ظهور الشبكة حتى زوالها، لكنه حين يلتقيك وجهاً لوجه لو سلم عليك يكون اتقطع..
والله جد..
زول ببقى ليك انستجرامياً، لكن في الفيسبوك ما بعرف إتكلم معاكـ، إذن هو قريبك من جهة الصور فقطـ، ما ببقى ليك بي أبوك..
وأخوك (في الواقع) قد يكون في الفيسبوك صديق صديق صديق ودعمتك..
ملاحظ معاي.
ثمة شخص قريب منك في الواتساب إن احتجت دعمه المادي (يرص ليك قروش الواتس كلهن في مسج) وإن جعت (يجيب ليك مطبخ الواتساب في رسالة).
واقف جنبك على طول، لكنه بعيداً عن الواتساب (رصيد بجنيه ما بحولو ليك)..
البعض ينظم إستراتيجية معينة للتعامل مع أهله وأصدقائه الذين هم من جهة اللاين، وإستراتيجية أخرى لأهله في (سناب شات).
مشاهد كتيرة تبين أن هناك أنساباً أخرى، أنساب إلكترونية معقدة نوعاً ما، وحين كتبت (يقام المأتم بالواتساب) لم أكن  أبالغ أبداً..
أقول قولي هذا من حيث لا حيث
وبناء على الكلام أعلاه واستناداً إلى ارتفاع تعرفة الإنترنت بصورة مبالغة المبالغة، ح يكون في قطع صلة رحم حاصل.
و……
الفهم شنو مثلاً ؟!