فوق رأي

هناء ابراهيم

هاشتاق آخر الأسبوع
{بالنسبة للشخص الذي حين يلمحك تتناول شاي الاطلاع مع رواية ما أو فلم، فيتبرع من نفسو ويحكي ليك بدون رضاك من أول حدث إلى آخر الأحداث ثم يختم حديثه بخلاص ما أخربها ليك أخليك تقراها براك.
براك أنت دا قول آمين..
دا على أساس كنت بتسلم عليّ مثلاً؟!
{حبوبة جيرانا حين تستمع لقانوني وهو يقول وفقاً للمادة كذا من قانون كذا التي تشير إلى كذا، تنتظره كي يخلص ليترجم كلامو فيما يعرف بترجمة العربي إلى عربي.
{القوي هو الذي يستطيع أن يكتم ضحكته في الوقت غير المناسب للضحك.
{لا أفهم لماذا يعتمد بعض الناس قانون من حلف مبتسماً فهو كاذب.
{في ناس سمحين ما لم يتكلموا، فإن حضر كلامهم بطل سماحهم.
والله جد..

قلبي ما داير معاك
حلمو زمان قِنع منو
لقينا هواك مشاوير هَم
وأي عذاب مبارنو
عشان خاطر فرح عينيك
ونحن فرحنا ناسنو
نذاكر في دروس ريدك
وريدنا انحنا راسبنو
تملحقنا ونصفق ليك
نقول الغلطة ما منو
نعيد أيامنا بين إيديك
فشلنا نجاحو ضامننو
وقلبي الليلة ناوي عليك
أخيراً قام على جِنو
في عز الشوق بِشخط ليك
وصالك مانا دايرنو
ولا دايرين كلام عنك
كفاية الكنا سامعنو
وقلبي الليلة حالف ليك
ونحن ولا مغالطنو
دا عاش الغربة في عينيك
رموش لقياك هجرنو
أخير يرجع حدود ريدو
مقامو هناك عارفنو
وأخير الدمعة بين الناس
لو الأفراح بسجننو
{و…..
يا مرحبا