فوق رأي

هاشتاق آخر الأسبوع
هناء إبراهيم
 
#ماعشان (الحب) بريدك
بس بريد (الحب) عشانك
حتى لو (الحب) لغوه
يبقى زمن (الحب) زمانك
ما كتير (الحب) عليك
وما شوية علي حنانك
أبكي دموع الخوف في بُعدك
وفي شواطئ العين أمانك
عندي ليك غرام مدفق
جوه في العينين مكانك
في ظلم بُعدك شقينا
ومافي زول في (الحب) أدانك
يا الكلامك صافي كلو
الله يحفظ ليك لسانك
مافي أجمل رقة منو
إلا كان لمسة بنانك
قلبي ليك في (الحب) نذرتو
عايش إتنفس عشانك
الأقواس لا تحمي الحب، إنما تخنقه..
تقيده..
أسميتها سبع (حبـ)ات) على الريق، من شاء قراءتها حبات له ذلك ومن رآها حب اتٍ فلينتظر.
#ليس أكثر إحراجاً من موقف ملكة جمال كولومبيا ودراما حفل تتويج  ملكة جمال الكون.
حاجة حارة والله..
 من مشويات المشاعر..
ضرر نفسي مقاس اكس لارج..
#شخص يقول ليك: والله العظيم أنا ما عايز أشكر ليك نفسي، لكن أنا بطل العالم في الأخلاق، أنا رجلٌ والرجال قليل، أنا السيف والليل والواتساب يعرفني، حيث أنني حاصل على دكتوراه في الصدق والشهامة وماجستير احترام ووفاء وكلمة، كما أنني  وسيم برتبة مشير وملياردير ابن ملياردير، أتغذى على الحب والكتب والثقافة والأدب، متزوج من 33 لغة وسليم الذوق.
على أساس دي شتيمة مثلاً؟!
أكثر من كدا تشكر روحك كيفن.
# يحيرني الذي يقول : أنت  ما طالبني حليفة
ثم يحلف ويحلف ويحلف
بتحلف مالك طيب..
وقت ما طالبنك حليفة بتتبرع لينا بحلايفك ليه؟
و………
#اللهم صل وسلم وبارك على نبينا محمد.