مواعيد مرقتك حانت .. !

مواعيد مرقتك حانت؟

خلاس هنديك بنية الروح مشت حتة قبيل كانت…
قصيدتي الشينة قبل تجيك …عشان عينيكا كم عانت …
بلا ما تخت رتوش حضنت عيونك ..وبيهن ازدانت ..
مواعيد طلتك حانت …
واشان مايجن حريم الريد …
مرقتك من مواعين روحي نقاط ضحكة ساعة العيد…
نفضتك من غبار الوجعة والوطن الحضور  وفريد…
فردتك للشعار القومي مشروع لون سياسي جديد…
لا …مشروع زول  ..بريدو شدييد..
وغنيت للبطون القبل ما تعرف جزاك خانت…
مواعيد مرقتك حانت …
  ولميت أمنياتي الحلوة ..رسلت العشم بالشوق…
ومديت أيدي بالحنية للقمر المصنقر فوق …
مراية دندنة وغنوات…
ودلوكة عرس فجرية. ..سيرة وهيلمانة سوق
ومحصول عيش. ..أكلنا فريكو من قبال …وحس وأسوق…
وشافعة مرسلة العصرية. ..للمرسال سليم الذوق …
فيااااازولي السليم الذوق. ..
لا يا القمر الموانس ضلي. ..والشمس المروقا شروق …
خبارك والوطن فاتح جراح الجتة مابي يروق …
ومنديل الحبيبة البدري. ..بالدمع السخين محروق …
وعيش مطمورة أبوك العمدة بي حبل المسد مخنوق…
وكلما ما الناس تمد أيديها …لي عيش الفكي الممحوق. ..
تضوق بالوجعة لحسة كوعا إلا الحبة ما ابتضوق …
ولسه ملامحي ما بانت…
ومواعيد رجعتك حانت …؟؟
مقسم وشي بين أحزان طفولة ودمعة لي باكر…
مشتت بين هموم الجوع وبين هم طفلة بتذاكر. .
عشان تتعلم القوة و. ..
تدافع ضد زمن ماكر…
زمن علمني. ..ما أرجع …قبل ألقاكا ياناكر. .
وأخليك تعترف بالريد …
عشان بت كم وراك عانت …
لا …مابت. ..كم وراك …عانت …
بت إحساسي العليك هانت …
مواعيد مرقتك …حانت…
ولا حانت  مواعيدك ….
ومحل تنقصبك الأيام سنين أحلامي بتزيدك. ..
وأزيدك ماعشان قلبي العرف نبضاتو بي ريدك …
عشان حارياك….مصاقر الشوق. ..وشايل حسي في أيدك. ..
تساسق في أضان الوجعة…روح  في الريدة ما اتوانت …
ومواعيد رجعتك .حانت. ..
لا ساعة اللقيا ماحانت …
بس القلب انتفض راجي…
ومصارين العشق راجيات مروق 
سن الغنا العاجي. ..
  ولا هاميني كان دايراك زوادتي وكسرتي وصاجي ..
بس دايراك رفيق للروح. ..
سفير لي مفردات البوح…
ضحك ضد المنى المجروح…
حبيب يوماتي بنناجي. …
وتفاصيل في جسد أحلام. ..كشف عن عورتا وبانت…
حروف. ..مرقت بعد مازييين …بكت بي شوقا وانهانت
تبشر بي وطن تريان. ..ولحظة نوحو ماحانت. ..
وكان مكتوب على جسد الحلم أنت …
مرق جسد الحلم ذات ليل …فضحني وفي الحلم كنت …
رسول لي شفع  الأفراح. ..
علم ماخد تفاصيل لوني ..
سطرين في كتاب مرتاح…
وتاريخ كلو مالقيت فيهو غير فدة سطر ماصاح. ..
شطبتو وكت لقيتو كتبني ..بت مالية الكتابة جراح…
كتبت. ..نضال…حسن عبد الله …
رادت ود خيار الملة…
غنت للوطن ماكل. ..
ربطت توب سكاته انحل. ..
مرقت كلمة واحدة غميييسة كم حول اللغز ما انحل. ..
ماكتبولا …في كراسه. ..غير مجنووونة رادت  صاح …
وبالريد صفحتا ازدانت .