النشوف آخرتــــا

فضفضة (الجمعة)

سعد الدين ابراهيم

نبدأ برسالة الصديقه “ليلى الوسيلة” تعلق على فلسفة ود الشواطين قائلة: وين دنيا بدون ضرب ومضاربة وجلد جيوب .. وجلد ذات وود الشواطين بفلسفتك دي شوف لينا دنيا جديدة مافيها ضرب وجلد .. فيها حقوق بدون إضراب ! .. خلينا (آخرتا) نوصل لي حياة متطورة بفلسفتك.
ونقول: في زمن نميري راجت نكتة أنه أمر بأن يجلد كل مواطن مئة جلدة، بعد القرار كان الناس يتدافعون نحو أم بدة يسألوهم لماذا؟ فقالوا لأن الجلاد هناك إيدو باردة!
أما الصديقة “أميرة فيصل المبارك” (زيتونة) فتقول في رسالتها: حكاية الجقر معاكم حكاية وفي الآخر اتمقلبتو ما عرفتو البحلكم من القطط يعني دخلتو في ورطة لي درجة رحلتو من البيت ههههه والله يا أستاذ انحنا نفس الفيلم عندنا قطة ضكرانة قبل فترة قبضت جقر كان معذبني في المطبخ لكن ما أكلتو والأيام دي كلو يوم فار بجو من جيرانا هي ما بتاكلم بتلعب بس بنشيلم نرميم في الزبالة.
ونقول: والله دي كديسة لقطة هرشة بس تخلي الفار يموت!
أما الصديق كمال الطاهر ود بارا يقول في رسالته: بعض الكلمات تزرع في العقل عبرة وبعض الكلمات تنتزع من الحلق عبرة وبعض الكلمات تصنع للأمل جسراً تمر عبره .. ويضيف في رسالة أخرى مصدراً القرار التالي : على مرور شيكان (الأبيض) أن تمنع تاكسي الرهد الأصفر من المرور بالطريق الفاصل بين حي الموظفين وحي أمير .. حادثين في يومين ونقول: ربك يستر ساكت.
الصديق “يونس فضل حسين” من الثورة الحارة الخامسة يقول :عمود اليوم 23 مايو (بديل العنف) يعتبر ورقة عمل جاهزة والحل في أم درمان الأميرية حيث ذكرت بأنهم في مشغولية وهكذا فإن الفراغ أُس البلاء ونأمل أن يؤخذ ما جاء في العمود في الاعتبار من جانب جهات الاختصاص، لأن العنف مرفوض في جميع المواقع بسبب التكنولوجيا التي نعيشها .
ونقول: إن شاء الله يكونو قدر التكنولوجية.. تكنولوجية شنو مع السيخ والسواطير والسكاكين!
الصديق إسماعيل الجعلي يقول في رسالته: أستاذنا العزيز أسعد الله أيامك بكل خير بمناسبة موسم التسجيلات أشارككم بهذا المسدار الذي لن أمل من ترديده حتى يتم إيقاف مهزلة التجنيس .. والمسدار يقول:
في كل الدول لابد تستوفي الشروط شان تاخد التابعية
وهنا عندنا الناس الكرام ليك قبال تجي يجهزو الجنسية
المسؤولين عنها لو كان عندهم بس ذرة من وطنية
ماكان يعملوها تكية ولي كل لاعب أجنبي يقدموها هدية.