النشوف آخرتــــا

ود الشواطين يُرَوِّض (أب رأسين)

سعد الدين ابراهيم

كان (أب رأسين) مدوخ الحلة السبعة دوخات.. يده كالمرزبة لا يفلت منها صغير أو كبير.. لسانه مثل الفلقة لن تسلم منه إذا (دست ليهو على طرف) يرش بفاحش القول وضربات يده الباطشة من يرشه أو يرش أولاده باللبن.. باختصار كان موقف الحلة على (فد كراع) ذات أمسية ونحن نحكي عن عمايله في ناس الحلة.. ضرب ود ناس (كتيره) بونية عمل وشو كلو قطاطي.. ضرب (أبو سامح) كف.. خله خدو أحمر زي الطماطم في الشتاء.. دفر عمك (جاد كريم) وقع نضارتو انكسرت وطقم سنونو وقع.. وعكازو البتوكأ عليهو طارت.. نحكي كل ذلك و(ود الشواطين) يستمع ويبرم شنبو! وينظر إلى البعيد كمن سيصطاد شيئاً.. انتبهنا له.. وقال له أحدنا على سبيل المداعبة.. إنت يا(ود الشواطين) ما بتقدر على (أب رأسين) ده؟
قال (بعد فترة): أنا ما في زول ما بقدر عليهو.. لكن انتو بعدين بتقعدوا تعملوا لي: حرام عليك.. ما بنقول ليك أي حاجة؟ تدخلت قائلاً: لكن ما تكون فيها أذية لي زول! ضحك (ود الشواطين) وصمت.. لما طال صمته قلنا كلنا في وقت واحد: أها.. فقال: كدي خلوني ألقاها؟ شنو؟ صحنا: قال نقطة الضعف.. نظرنا إلى بعضنا فنهض (ود الشواطين) وقال: الأيام بيننا.
لاحظنا أن (ود الشواطين) بدأ يرابط أمام بيت (أب رأسين) وصادق أولاده.. وأخذ يتونس معهم ويرشوهم بالشكولاتة والبارد.. حتى زوجة (أب رأسين) التي يخشاها الجميع لأنها في أقل حاجة تقول ليك: إستنى إنت لما يجي (أب رأسين).. عندئذ عليك أن لا تفعل شيئاً سوى أن تشيل شيلتك.. استطاع (ود الشواطين) اختراقها فهو يجري ليحمل عنها الأكياس حتى يوصلها إلى البيت وينافقها حتى تفغر فاها من الدهشة.. بعد عدة أيام ونحن في عز السمر حضر (ود الشواطين) متهللاً: خلاص ح انتهى ليكم من الراجل؟ هتفنا: منو (أب رأسين).. فقال بالضبط كده!
لم يرد على أسئلتنا عن الطريقة التي سيستخدمها إنما طلب منا أن نساعده بشيء بسيط.. ألا وهو افتعال مشكلة مع (أب رأسين) وهو كفيل بحسمها لصالح المفتعل.. طبعاً لم يجرؤ واحد منا على التطوع.. فأخذ (ود الشواطين) يغرينا: حاجة بسيطة يعني زي تنهر ولدو؟ أو تزجر بتو؟ أخيراً تطوع واحد منا بالقيام بالمهمة.. وسرعان ما غير رأيو.. وانسحب.. فأخذنا نحرضه ونشجعه على قبول المهمة رغم أننا نعرف حجم المجازفة فيها إذ ربما تنال بونية حارة.. أو كف حاسم.. أو حتى (دفرة) في صدرك.
اتفق مع المتطوع على خطة وقال: موعدنا بكرة العصر.. وفعلاً.. نهر المتطوع ابن (أب رأسين) فحدث والده وتأبط الشر وجاء فتهرب المتطوع وقال له نتلاقى العصر قدام دكان (محمدين) وانتظر (ود الشواطين) وهو يلعن الشجاعة الحمقاء التي جعلته يوافق على هذا التحدي.. وعندما ظهر (ود الشواطين) يحمل كرتونة صغيرة وقال له: هيا بنا.. سأله أها نعمل شنو؟ قال له: استفزه وخليك بعيد منو.. يقول ليك ناهر الولد مالك؟ قول ليهو ولدك قليل أدب وأرجع خطوة وخلي الباقي عليّ.. وفعلاً بدأ الشجار.. و(أب رأسين) تطاير الشرر من عيونه وهجم على المتطوع ففتح (ود الشواطين) الكرتونة التي خرجت منها كمية من الصراصير وما أن رآها (أب رأسين): حتى أخذ يتقافز ويصرخ ويجري كالمجنون.. فأخذ الناس يضحكون من الموقف.. حتى دخل منزله وهو في خزي.
فيما بعد حكى لنا (ود الشواطين) أنه كان يبحث عن نقطة ضعفه فعرف من أولاده أنه لا يخاف من شيء سوى الصراصير ربما بسبب عقدة قديمة أو هي (فوبيا) يعاني منها تجاه الصراصير.. أخيراً سرت شائعة أن (أب رأسين) راحل من الحلة الفقر دي!