كاتبة معروفة تعثر على (صرصور) داخل (رغيفة)
الخرطوم_ المجهر
تفاجأت الكاتبة المعروفة “ندى أمين” بوجود حشرة (صرصور) داخل خبز قامت بشرائها من أحد المخابز الموجود بأرقى أحياء العاصمة السودانية الخرطوم.
وحكت الكاتبة التي تمتلك عددا من الكتب أشهرها وأبرزها (الواقع ورهانات المستقبل) على حسابها الرسمي عبر موقع التواصل الاجتماعي فيسبوك قصتها مع الخبز والتي حدثت صباح (الثلاثاء) وفقاً لما نقل عنها محرر موقع النيلين.
وكتبت “ندى” التفاصيل كاملة وأرفقت داخل تدوينتها صورة للصرصور الذي عثرت عليه داخل قطعة الخبز.
وقالت: (كنت في مشوار في الرياض وجيت مارة بمخبز وشفت ناس واقفين ورائحة الخبز الطازج خلت عصافير بطني تزقزق أكتر لأني أصلا كنت جوعانة والساعة ماشة على اتنين ونص بالضهر وأنا لسه ما فطرت).
وتابعت : (وبعدين قلت أفران الرياض دي أكيد بتهتم بالجودة لأن الشريحة السكانية هناك راقية وما بعجبهم العجب هههه. المهم ترجلت بسرعة من العربية وشلت عيش بعشرة جنيه عاينت لقيت جنبهم سوبرماركت شلت من التلاجة البرة علبة بيبسي باااردة يقطر نداها وسمحت لنفسي بتجاوزات بالرغم من مقاطعتي التامة للمشروبات الغازية. وجري على البيت وطبعا يا جماعة الجوع كافر شلت أول رغيفة وقعت عليها عيوني من الكيس وقبل ما أحشيها بالطحنية الكان نفسي فيها مع البيبسي البارد داك لاحظت فيها حتة محمرة كده وطبعا يا جماعة زي ما قلت ليكم الجوع شنو كافر فقلت دي بتكون من حرقة الفرن بس أشيلها أقطعها سريع كده وأعمل حشوتي).
وواصلت “ندى” أمين سردها للواقعة: (وفي اللحظة ديك لاحظت أن الحتة المحمرة دي حاجة كده فيها شنب ورجلين وأجنحة كمان.. اتخيلوا طلع صرصور أب شنب ومن الحجم الكبير وبكامل قواه الجسدية والعقلية قرر يتلصق في العيشة دي. طبعا من شدة القرف حتى الجوعة طارت وحردت الأكل وصورت ووثقت اللحظة التاريخية دي للذكرى والتاريخ ولا نامت أعين الجبناء).
