فوق رأي

مقولات الأمهات (3)
هناء إبراهيم

هذا الجزء خاص بالمقولات الموجهة للبنات
(تتكشمي زي نار القصب)
هل ثمة ما هو أجمل من الابتسامة؟! حدثيني.
وهل الابتسامة موافقة أن تطلقوا عليها (كشيمة أو تكشيمة)؟!
(تسرحي بي غنم إبليس)
(قلبك وين؟)
هو عشان كسرت الكبابي لازم يكون قلبها مسافر وناسي هواك؟!
(فالحة لي دا بس)
برضو فلاحة في النهاية
(قلبك دا مقدود؟!)
بنقط ريدك
(كان ودوك للبحر بتقولي ما لقيت موية)
يمكن خافت من التمساح..
(تاني النسمعك تقولي لي ماشة لهناية)
هناية دي صاحبتك طبعاً وذلك لأنك اتأخرتي.
(على وين مدلجة شعرك كدا؟)
(فاكة شعرك دا كدا من طولو)
لا يعني لو طويل تفكوا عادي؟!
(قومي لمي تفتك دي) وقد تسميه (نيش)
(ليه تمشي ليها إنتِ… مالا هي ما تجيك)..
هي ذاتا أمها ح تقول ليها نفسي كلامك دا..
(تكوسي للدرب ما تلقي)
وتجي تقولي بتي راحت وخطفوها وبتاع وهناي.
(فاتحة خشمك.. ما تشوفي ليك ناس تجي تقهي)
(تضحكي براهن) وفي رواية أخرى (بلا سنون)..
ما بعرف مشكلة الأمهات شنو مع ضحكة البنات.
(تتلمحي جربا)
(يبردن كرعيك)
لا حول ولا قوة إلا بالله
(قشار)..
وهو الاسم الذي يطلق على الابنة حين ترتكب (كبيرة) جريمة منزلية كأن تحرق حلة الملاح..
(إنت برجعوك بي خبيزك)
وهذه هي الجملة الأشهر على الإطلاق..
(أخجلي عليّ.. هسه كان جانا ضيف يلقى الواطة دي مبشتنة كدا؟)
(بقيتي أي موضوع مستلماهو على حسابك)..
(أها دا آخر ما اتوصلتي لي؟)
(القدرك عند العرب بي أولادا)..
أقول قولي هذا ومرفق احترامي كله..
و…….
نواصل بكرة إن شاء الله.
لدواعِ في بالي..