فوق رأي

 نحن كذابين
هناء إبراهيم

الذري إبراهيم عوض (له الرحمة) قال:
ما بقدر أبوح
أنا ما داير أصرح
يمكن قول يروح.. يمكن قول يجرح
يمكن شيء يفوح.. والناس ما بتريح)..
نحن كـ ناس لو الكلام منطقي ممكن بعضنا ما يريح.. فما بالك لما الكلام يكون (طلس) باين بينونة كبرى..
ففي ذلك تقول حبوبة ناس جيرانا الزول لما يصرح لازم يكون بعرف يصرح..
والله جد..
لازم يكون (مصرحاتي عميق) تعاين للتصريح دا تشوفو صاح وحقيقي وابن واقع وعقل…
المهم دا كلام أغاني ما لينا دعوة بيهو.. وعلى ذكر التصريحات طالعت (خطوط حوار) لمسؤول قال أي زول يقول الخرطوم وسخانة كذاب..
شايف كيف؟!
الخرطوم تلمع… الخرطوم تسوي كدا..
هو بس في تطور حصل في الدنيا نحن لم نستوعبه بعد.. حيث إن البعوض غير أماكن ومواصفات توالده والذباب أتحضر جداً وصار يتكاثر في النظافة..
الذباب افترى يا جماعة..
 وفي ما يتعلق بما نحسب أنه قمامة تملأ الطرقات.. هذا يا قوم نوع خاص من أنواع الزهور أما الروائح المنبعثة منها فهي عطور ماركة ..
وهسه شربنا الشاي..
وبالنسبة لعربية النفايات التي تشتكون من غيابها عن حيكم وتعبرون عن اشتياقكم لرؤيتها… قاعدة تجيكم لكنها تأتي بصورة لا مرئية حتى لا تزعج سيادتكم..
اتفرجتوا؟!
على صعيد متصل: التصريف ما شاء الله عشرة على عشرة.. لدرجة أننا مندهشون أين تذهب مياه الأمطار بعد أن تنزل من السماء… كيف تتصرف بهذه السرعة تاركة لنا مساحة الاستمتاع بالجو الحلو..
مواقف المواصلات جافة ونضيفة والمواصلات متوفرة..
والكهرباء مستقرة كاستقراركم في مناصبكم الدائمة..
ومافي نفق غرقان..
وكلو تمام..
أقول قولي هذا كـ نصف تعليق..
خلي الكذب أها بقينا منافقين
و…….
بشوف القلب
والله جد