فوق رأي
هاشتاق الخميس
هناء إبراهيم
#في هذه الأيام الممطرات لازم تأمن نفسك وتاخد تلفونات ناس الحي..
تلفونات ناس الحي أهم من أي حاجة..
والله جد..
عشان الصباح قبل تطلع من البيت ضروري تتصل وتعرف المخارج والطريق الذي هو (أفضل السيئين) وأماكن الطين الكثيف والحفر العميقة لتجنبها وهكذا..
غير كدا ح تضيع..
بدون المعلومات دي قد لا تستطيع الذهاب إلى وجهتك..
الأهم من دا لازم يكون عندك تلفون طوارئ لشخص محترف طرق في الحتة الإنت ماشي ليها وذلك لذات الأسباب..
إن لم تكن علاقتك بالحواليك جيدة هذه الأيام فإن دراستك وعملك في خطر.
والله جد..
#في ناس معينين إنت ما بترتاح في حياتك دي إلا لو كل شوية حلفوا ليك وأكدوا ليك إنهم بحبوبك وبحبوا يتكلموا معاك وإنهم والله العظيم مستحملنك ورايدنك وأي شيء.
والله جد..
#لما الحاجة تكون عاجباك مهما (اتمرمطت) واتبهدلت واتبشتنت بتكون مبسوط..
وفرحان وبتغني كمان..
#ثمة أشخاص لديهم معايير عالية جداً لما يلقوك سعيد وفرحان بإنجاز إنت عملتو (ببستفوا ليك عملك) وبقللوا ليك من قيمو.. فعليك الله ما تشتغل بيهم..
ديل أقسم بالله ناس نظريات ساي.. ربع الإنت عملتو دا لا يستطيعون فعله.
والله جد..
#في السويد لديهم برنامج جميل جداً لإنقاذ المصابين بأزمات قلبية.. بدربوا كمية من المتطوعين في هذا البرنامج وتعليمهم طريقة الإنعاش الرئوي وإدراجهم في قائمة.. وحين يتم تبليغ الإسعاف بوجود حالة أزمة قلبية هناك رسائل فورية تصل لأقرب شخص مدرب فيذهب لإسعاف المصاب قبل أن تصل سيارة الإسعاف مع إنو سيارة الإسعاف بتجي سريع..
حينئذ..
#و………
يعني كيفن ما بريدك
