الواعدة (إنصاف فتحي): لهذه الأسباب نحن جيل غير مجتهد!!

(إنصاف فتحي) صوت قوي وحضور مميز، اتفق الجميع على موهبتها وحلاوة صوتها، منذ أول ظهور لها في برنامج (نجوم الغد)، استطاعت في فترة وجيزة أن تحقق نجومية كبيرة، وأن تخلق لنفسها قاعدة جماهيرية عريضة، و(المجهر) إذ تلتقي بها في هذه المساحة الرمضانية، إنما تفتح كدأبها نافذة للمواهب الشابة حتى (يطلون) على جمهورهم الذي يتحرق لمعرفة الكثير من تفاصيلهم، فإلى  الحوار الخفيف:
{ متى كان أول ظهور لك؟
_ في برنامج (نجوم الغد).
{ طيب.. متى اكتشفت بأنك تمتلكين صوتاً جميلاً؟
_ منذ أن كان عمري 8 سنوات.
{ أكيد هنالك من شجعك في بداياتك؟
_ أستاذتي في المدرسة، كانت دائماً تقول لي أنت لازم تغني لأنو صوتك جميل، وأسرتي أيضا شجعتني كثيراً بس كان شرطها الأساس أني أواصل دراستي.
{  وهل واصلتِ بالفعل؟
_  نعم، هسى أنا أتخرجت في جامعة السودان ودرست هندسة ري، والآن (نزلت training).
{ كنت في بدايتك بتغني لي منو؟
_ والله الغناء السوداني جميل، وكنت بغني أي أغنية تعجبني.
{  عاوزاك تحددي لي فنان بعينو؟
_ بغني لزيدان إبراهيم وإبراهيم خوجلي وعدد كبير ما بقدر أقولهم ليك.
{ طيب أكثر أغنية بتحبيها شنو؟
_ بحب أغنية (عشان خاطرنا) لمصطفى سند ومحمد ميرغني.
{ يا إنصاف.. بقولوا انو جيل الفنانين الشباب غير مجتهد؟
_ هذا كلام صحيح.
{ وأنت من هذا الجيل؟
_ نعم، صحيح انو نحن ما مجتهدين وبنكتفي بترديد أغاني الفنانين الكبار، وهذا لا يعني انو نحن ما طموحين، لكننا ننفذ طلبات المستمعين والمتابعين لأنهم دائماً عاوزين يسمعوا أغنيات قديمة.
{ هذا يعني أن أعمالكم الخاصة دون المستوى؟
_ لا، لا، هذا غير صحيح، لأننا نتعامل مع نفس الشعراء الذين أثروا الساحة الفنية بأشعارهم الجميلة، لكننا نحتاج إلى زمن حتى ترسخ أعمالنا في وجدان المستمع خاصة وأن المستمع السوداني (أضانو نضيفة)، ويعرف الجيد من الغثاء.
{ هل لديك أعمال خاصة؟
_ أكثر من 10.
{ من هم الذين يكتبون لك ؟
_ أزهري محمد علي، عبد الوهاب هلاوي، ود المأمور، والآن بصدد عمل جديد مع الشاعر الكبير إسحق الحلنقي.
{ اسموا شنو العمل دا؟
_ اسمو (في حاجة).
{ مشاركتك في برنامج (عصافير الخريف) هل أضافت لك؟
_ التعامل مع شاعر بقامة “الحلنقي” وحده إضافة.
{ أها ح نشوفك وين في العيد؟
_ سجلت قبل يومين لبرنامج سهرة في العيد الذي ستبثه قناة (النيل الأزرق) وحلقة أخرى لتلفزيون السودان ستبث في أول أيام عيد الفطر المبارك، وكل سنة وانتو طيبين.
{ خلينا في رمضان؟
_ والله رمضان افتقدت ريحتو في الجزيرة (مدني)، لأن رمضان هناك ليهو طعم تاني، لمة الأهل والأحباب ولمة الشاي والقهوة، وفي مدني رمضان عندو طقوس خاصة، والأجواء أوروبية (عشرة يوم) ما بتشوف شمس، لكن في الخرطوم هنا يا ساتر كل زول في حالو، نادر ما يجيك زول، والله أنا مرات ما بشعر بانو أنا صائمة إلا عند الأذان.
{ زولة آبري ولا حاجات تانية؟
_ والله إذا كنت معزومة في بيت زول لو ما في آبري ما بجيهو.
{ أها والمزاج؟
_ أنا زولة بقارية بالـ(معاش)، والقهوة دي عندنا ضرورية.
{ ويومك الرمضاني..كيف تقضينه؟
_ ما بين التعبد وأداء الفروض، أحضر صينية الفطور للرجال والنسوان، ثم أبدد باقي الوقت في (الفيس بوك).
{ أشياء تحرصي عليها؟
_ متابعة برنامج (مع كل الود والتقدير) بفضائية (الشروق).
{ متى كانت آخر مرة شاركت فيها في عمل خيري؟
_ آخر مرة، لا أذكر تحديداً، لكنها كانت في داري المايقوما والمسنين.
{ لو جاك زول قال ليك غني لي.. لكن ما عندي قروش؟
_ والله أنا أهم شيء عندي حق العازفين، وعن نفسي مستعدة أغني لأي زول مجاني.
{ لماذا تخطط إنصاف مستقبلاً؟
_ أن أضع بصمتي الخاصة.
{ أشياء لا يعرفها عنك الكثيرون.. أكشفي لنا عن بعضها؟
_ أنا زولة مجنونة بالكورة، ويمكن أن أفوت بروفة من أجل الكورة.
{ طيب هلالابية ولا مريخابية؟
_ هلالابية على السكين، وأتمنى للهلال التوفيق في مشواره الأفريقي، والتوفيق أيضا لبقية الفرق المشاركة المريخ والأهلي شندي.