مقاطع للوطن
التجانى حاج موسى
يا جمالك
يلا بلادي
جيت أغني ليك
نشيد..
ما خلاص نادى المنادي
أتولد سودان جديد..
**
لو عذابك طال كتير
وبالسنين مستحملاهو
وضقت ويلات السعير
وشفت من الويل شقاهو
الشروق ساطع جميل
والبلد مستنياهو
يبقى كل الجاي خير
يمسح القبلو ووراهو..
**
وأنت يا شعبي الجميل،
فيك ملامح
ما بتزول..
أنت من أصلك
نبيل..
خاتي كلمة
وخاتي قول..
أنت يا الدغري
وعديل
أنت يا العارف الأصول
يشهد التاريخ قبيل
فيهو مثلت الفصول..
**
نحن لو كان
يوم سهينا
مرة من عمر الزمان
نحن عهدك
ما نسينا..
ولما حان وقت الأوان
جينا من غربتنا
جينا..
وتاني في نفس المكان
اتحدنا واتفقنا
نطرد الذل
والهوان..
**
وأبدا أفرح بيك
وأغازل
يا وطن رائع
وماهل
وافتخر بيك
في المحافل
وأزرعك ورد وسنابل
وانظم الأفراح نشيد
ما خلاص نادى المنادي
اتولد
سودان جديد
**
وأطرد النوم
من عيونك
ما خلاص طلع الصباح
وخلي بالك
للبخونك
يلا هيا
على الفلاح!!
**
وأبدا أول خطوة
وأمشي
الطريق لسه طويل
ولسه قدامك
ألف فرسخ
ألف ميل!!
وأنت يا وسودان
قيافة
فيك تراب
راويهو نيل
وأنت يا سودان
ثقافة
من زمن بدري وقبيل!!
**
ونادي أولادك
وأصرخ
غربتم طالت
سنين..
وأفتح أحضانك
وأفرح
وضمهم – بس –
بي حنين..
وأوعى تطلع
كلمة تجرح
وتاني نرجع
للأنين
والزمن يسرقنا
يسرح
وتاني
يسلبنا اليقين
**
وخلي بالك
للمدارس
خالي بالك..
حصة.. حصة..
وللكراريس أبقى دارس
والدرس نقراهو
هسه!!
وللتلاميذ أبقى
حارس..
همَّ طينة
ولسه هشة!!
**
الصبر هدَّ الجبال
وأنت صبرك
ما اعتيادي
وخلي ضرعاتك
طوال
توصل القرى
والبوادي
ولمهم..
لمة رجال
وافتخر قول:
ديل ولادي!!
وأطرد النوم
من عيونك
ما خلاص طلع الصباح
وخلي بالك
للبخونك
يلا!! هيا
على الفلاح..
