فوق رأي

طب الريدة بي ( (70
هناء ابراهيم
حسب نتيجة القبول المهم فإن إحرازك نسبة نجاح ( 70.7) تؤهلك لدخول طب الريد زي السلام عليكم..
المهم الـ أربع مواد الأساسية:
نمرة واحد: الانجذاب اللا إرادي
كأن يأخذك الاهتمام بشخص ما على خوانة..
ثم مادة الإحساس الحقيقي (لأنو مرات بكون في حب كاذب، بتهيأ ليك إنك بتحب الزول دا في حين إنك ساقط كيمياء معاه)..
بتحصل والله..
ثم ثالثاً: لغة هواه الخاصة
أن تسمعه حين لا يحكي وأن تفهمه حين ترتبك الدواخل.
نمرة أربعة: قهوة الإخلاص بجنزبيل الصدق
بالإضافة إلى عدد من المواد الإضافية (بعض الجنون/ التفاهم/ التحمل/ والسير على كف الإحساس وجسر الأشواق)..
الريدة دي حسب فهم حبوبة جيرانا، عبارة عن مجموعة مواد حسية يجب أن تنجح فيها بمعدل مناسب وكويس سواء في المساق الاجتماعي أو المساق العاطفي وأن لا تسقط في مادة عشان ما تسقط من العين.
اتفرجتوا؟!
ورغم إنو طب الريدة بي( 70) لكن ممكن بي ((90 يشيلوك (هندسة جراح)..
شفت التأليم دا كيف..
الغريبة في الشهادة العاطفية، يتم القبول عن طريق التقديم الخاص..
يعني ما ممكن تقديم للريد في ميدان جاكسون مثلاً..
انت ما نصيح..
والتقديم الخاص شوقو غالي..
يحتاج إلى الشهادة الغرامية أو ما يعادلها..
ولكلية القلب مقعد واحد..  يصير مريحاً بتعاملك الجيد وتعاطيك مع المقرر والمنهج..
ولأن الاختلاف والتميز مغري للغاية.. (زي) الريدة ما حلو يكون موحد، يجب أن نجرب كل ألوان الحب واستايلات المشاعر..
أقول قولي هذا من باب الونسة طبعاً
و………
رسبت طب عينيك ودبلوم هواك العالي
لدواعٍ في بالي .