فوق رأي

من تفاحة حُب إلى كيس جوافة
هناء إبراهيم
 
معلوم لسكان الأرض ممن خاضوا تجارب عاطفية عميقة ووصلوا مراحل متقدمة في الحب ومشتقاتو، أن هناك بني آدم مهما استبسلت وحاولت وكسرت رقبتك لن تكون قدر كلمتك معاه ولا قدر عنادك بجفاه..
بتقول ليهو إنك خلاص حـ تمشي وإنو ما حـ يشوف خلقتك تاني، والكلام دا أبداً ما بحصل..
بتحلف ليهو سبعين يمين إنك ماحـ تهوب ناحية رقم تلفونو ولا ترد على مكالماتو وفي النهاية بتصوم تلاتة يوم لأنك عجزت عن الإطعام، تماماً كما عجزت عن الفراق وعدم الرد..
بتقول ليهو إنك ما حـ تجي مرة أخرى، وبتجي قلبك فوق رقبتك..
تتنازل عن ألوانك المحببة عشان ترتدي لونو المفضل وما بهمك إعلان التمرد على مزاجك اللوني..
نهائي ما بتقدر تكون قدر كلامك لما تحاول تعاندو..

من ناحية نسائية: لما تكوني مسيطرة على الوضع الفضائي وشايلة الريموت وبتحضري أحداث فلم عاجبك شديد وتجي مواعيد الكورة القبيل قلتي ليهو ما بخليك تحضرا، بتتنازلي عن الفلم وعن كلامك وأقوالك السابقة وعن أي حاجة وبتحولي من الفلم إلى المباراة، وتقومي تعملي ليهو عصير كمان .
كل ذلك تحت أمر الحب أجاركم الله..
هذا الشخص لما يفتري عليك، عادي ممكن يتصرف في قلبك العندو، ويدفع منو إيجار الغيرة ورسوم الأشواق ومصاريف البعاد.
ولما تجي عشان تشيل قلبك منو،  تجد أنه ومع الأسف (اتصرف في قلبك) .
حتي لو استلمتو حـ تستلم قلب بلا محتويات..  قلب جثة وجثة قلب.
لابدق .. لابشتاق .. لابخاف ولا بجيب الحجار..
بعد ما كان قلباً منتجاً في كل المواسم أصبح قلباً غير صالح للزراعة…
قلب بُور.. كيس جوافة كما يقولون في مثل هذه المناسبات.
ولأنو أصبح غير صالح للزراعة ممكن عقلك يوزك تحولو إلى مجمع سكني، وبرضو ما بنفع لأن المشاريع القديمة حفرت عميقاً وجعلت التربة هشة ومريضة ومستعدة للسقوط .
سلمتو قلبك كـ تفاح الحب وشلتو منو كـ كيس جوافة.
فـ عاين:
لو ح تأمن قلبك لحد، خلي يكتب ليك تعهد عديل..
تعهد يحتوي على غرامة ضخمة..
قلت ليكم مؤخر الصداق أهم من المهر وسد المال لكن ما دايرين تصدقوني..
أقول قولي هذا من باب التنظير طبعاً
و……..
ختيتك في بالي
لدواعٍ في بالي.