النشوف أخرتا

‫الهوجاكولا

سعد الدين ابراهيم ‬

‫مُص فى دمنا يا دراكولا‬
‫مافيش مشكلة‬
‫بكره نعوض بالهوجاكولا‬
‫الهوجاكولا.. أهي الهوجاكولا‬
‫.___.
مرة صحا الجمهور من نومو‬
‫لِقي في كومو‬
‫حكاية مهولة‬
‫ضاق الطعم وقال مقبولة‬
‫وأقول ليك يا صاحب قولة‬
‫سر الدنيا وسحر الكون‬
‫الهوجاكولا.. أهي الهوجاكولا‬
‫._____.‬
‫مرة صحينا فِ ذاتِ صباح‬
‫ديكنا اتبكم وغلبو صياح‬
‫لقينا بيضرب راسو تراح ترراح‬
‫جبنا العيش‬
‫جبنا ألذ بذور وأعلاف‬
‫قلنا الديك يظهر خواف‬
‫دلعناهو‬
‫وحنسناهو‬
‫جبنا حبوب أنواع وأصناف‬
‫صاح في صوت نبراتو ضعاف‬
‫كاك كاك كاكولا‬
‫كاك كاك هوجاكولا‬
‫._____.‬
‫كدايس حينا كسبت عادة‬
‫فرحنا لإنها فيها افادة‬
‫سابت فجأة حمام حلتنا جدادة‬
‫أبت اللبن الدسمو زيادة‬
‫والفيران رتعت وأولاده‬
‫يا كدايسنا الباعت أصولها‬
‫صاحت فينا بكل سهولة‬
‫ناو .. ناو.. ناو هوجاكولا‬
‫قصدها طبعا..‬
‫إنها دايرة دايرة تمزمز بالهوجاكولا‬
‫أطفال حينا رفضوا البزة‬
‫رفضوا حليب الأم النزه‬
‫حليب البقرة حليب المعزة‬
‫القاموس ياخوانا اهتزه‬
‫الأطفال حيضيعوا خلاص‬
‫صاحوا الشفع في إخلاص‬
‫إنقا.. إنقاا..إنقاكولا‬
‫إنقا ..إنقا هوجاكولا‬
‫ومص في دمنا يادراكولا‬
‫مافيش مشكلة‬
‫بكره نعوض بالهوجاكولا‬