نشوف اخرتا
معقولة بس!
سعد الدين ابراهيم
أي زول بقى تلقاهو ماشي يطنطن.. ويتكلم براهو لأنو كلما يمشي الدكان ولا يدخل السوق يلقى السلع زادت والأسعار مولعة نار.. كل يوم تزيد والله الخصخصة حاجة كويسة وتحرير الاقتصاد حاجة كويسة لكين نحنه ناس كعبين.. اعتبرنا التحرير انك تبيع على كيفك وشوف لما كل زول يبيع على كيفو ح يحصل شنو ح تحصل فوضى .. وما في رقابة على الأسعار لأنو السوق حُر.. ولما يكون السوق حُر.. وفي احتكار والعرض بسيط جداً والطلب كبير جداً ح تبقى الحكاية حرية مطلوقة ساكت.. والحرية المطلوقة دائماً عواقبها وخيمة.
لو أديت أولادك حرية مطلوقة ح يعملوا زي ما عايزين وتبقى النتيجة وخيمة عليك وعليهم.. المدرس في المدرسة لو خلى الحرية مطلوقة الطلبة والطالبات ح يكونوا فاشلين في الدراسة وفي الحياة.. كذلك الحرية الاقتصادية.. لازم تكون محكومة بالإنتاج الوفير يعني أدي الناس فرصة يزرعوا.. بدون ما تجننُ بالضرايب .. وتعلي ليهم الكهرباء والسماد.. خليهم يزرعوا بتكاليف معقولة كده ح يكون الإنتاج وفير ولمن السلعة تتوفر ويبقى العرض اكتر من الطلب الحاجات بترخص بالضرورة.. خلي المصانع تدور بدون رسوم كتيرة وجمارك على كل حاجة.. وجبايات في كل موقف ووفر ليهم الكهرباء والموية.. المصانع ح يزيد إنتاجا ويملأ السوق ويكون العرض اكتر من الطلب وبالضرورة المصنوعات ح ترخص
على العموم الناس بقت ماشة تنقنق وتطنطن وتبرطم.. وده طبعاً ما جن.. دي اندراوه وقالوا أهلنا الجن بداوي كعبه الاندراوة.. يعني بي صراحة كده نحنه عايشين نكون في مستشفي أمراض نفسية وعصبية كبير وأخير الناس الجوة المستشفيات على الأقل بلقوا عناية وعلاج واهتمام.
زمان قالوا الدنيا مسرح كبير.. وناس قالوا الدنيا بحر كبير.. هذا مع الغلاء ده بقت الدنيا مستشفي كبير للأمراض النفسية والعصبية.. وكان مغالطني عاينو للناس البتكلموا براهن.. ما تقول لي بتكلموا في موبايلات.. لأنو الغلاء والفلس ذاتو خله الناس (مِس كولات) ساكت.. وزول برد على مسكول ما في.. يا رب تجيب العواقب سليمة.
لاقيت واحد واقف في صينية يعني بقي (جنريتر) ماسك في كلمة واحدة (معقولة بس) يكررها طوالي ويوقف الزول ويقول ليهو معقولة بس وتاني ما بدي أقوال لمن سألت عن الأسباب قالوا: كلما يمشي ويسأل من حاجة يشتريها يلقاها زادت مع انو أمبارح اشتراها بي سعر فبقي يقول معقولة بس .. وعلق فيها طوالي.
الغريبة بعد أتأملت حالتو مسافة طويلة مشيت مشواري وكنت داير اشتري دواء وفاكهة لزوم العلاج وكده لقيت الدواء زاد مية في المية ولقيت الفاكة ما بتتهبش صنقعت ودنقرت وعديت قروشي واختصرت الدواء بدل اشتري صندوق اشتريت شريط وجبت من الفاكهة عينات قلت: إن شاء الله نعاين ليها ساكت أو نشمها ونضمها وأنا ماشي على البيت لقيت روحي بتكلم برأي بقول: معقولة بس!
