فوق رأي

شعر مستعار من الزول الجميل
هناء إبراهيم

(1)
أسألي الشوق في عيوني
قدر إيه جواي مساحتك
قايدة في صدري المشاعل
من وهج نيران سماحتك
يا الكبرتي معاي وصرتي
ماليه كل الصورة إنتي
كان مسورني القلق .. جيتي للفرح انتصرتي
وكنت بلقاك بي ظنوني.. وياما صابرتي وصبرتي
….
شوفي من ساعة عرفتك.. الكلام جننتو كيف
قدر حبك داير أغني.. بس أجيب من وين حروف
(أبجدية الجمال كانت كلها لك)
(2)
دايرة أقول ليك في هدوء.. بعد ما انتهت الصداقة
قلنا نفضل أصدقاء .. ما قدرنا على الصداقة
(قصتين)
(3)
أوعى تتبسم براك زي شمس بعد الغمامة
الناس بعرفوكا بتحب.. بعد تلك الابتسامة
(إشارة غرام وهيام)
(4)
أحبك عجايب.. معاي ولا غايب
ما انت مُفرد عُصارة حبايب
(إحساس وسيم جداً)
(5)
يا حبيبي كلما .. جابوا سيرتك في الكلام
قلبي يفرح بينما .. انت سادر في الخصام
برضي طامع ربما.. يرجع الحب والسلام
….
يا حبيبي حيثما .. سرت صورتك في المكان
أجري نحوك ريثما.. أوصلك ألقاك كان
أرجع أذكر عندما.. كنا في عز الحنان
…
يا حبيبي إنني من أحنَّ العاشقين
من حنيني كأنني .. والد الناس أجمعين
ما ح أنسى لأنني صدر مُترع بالحنين
(6)
أقول اتجاهلك برضو.. أقول اتسدى طنيشك
أقوم أعبر وجودك ساي .. تقوم تغزوني بي جيشك
فأستسلم وأهفو إليك.. بريدك حتى في طيشك
….
تصدق ما قدرت عليك.. غرورك ذاتو فيك خايل
طبيعي أكون ملهلهة بيك.. تكون في ريدي ما سائل
(هنا حيث الضعف قوة والاعتراف بالريدة واجب)
(7)
عند جيرانا الشمس بتشرق .. ومن جيرانا يجينا النور
شوف هاجرت بعيد للفرحة .. والبيني وبين الفرحة السور
(بت الجيران)
اللهم أرحم أبونا “سعدالدين إبراهيم” بواسع رحمتك وأكرمه بجنات النعيم.