فوق رأي

تركيب خُصل إنجليزي تالفة
هناء إبراهيم
 
شاهدنا الكثير من أشكال اللماضة والتصحر التربوي وما إلى ذلك من انخفاض منسوب الأخلاق لدى الأبناء تجاه آبائهم، وقد رأينا وفق عدد من زوايا الشوف أن (أمهم وأبوهم) مسؤولين أمام الله وأمام المجتمع عن هذه الحالة التربوية البطالة.
وأن اللا مبالاة المتمثلة في عدم الاكتراث لعبور الملايات حاجز السرير وسقوط المخدات على الأرض وترك صباع المعجون مفتوحاً يعود لكونه تعود على الفوضى منذ شنو كدا ما بعرف.
لكن قبل فترة تيقنت تماماً من صدق مقولة حبوبة جيرانا (القلم ما بزيل بلم).
والله جد..
على أساس إني ح أضحك، طلبت مني قريبتنا مشاهدة فيديو سجلته لزميلهم بالجامعة بطلب منه وهو يتحدث مع والده المقيم بإحدى المناطق النائية خارج خريطة التعليم.
كان زميلها هذا قد جمع أصدقاءه حوله ليسمعهم كيف يضحك على والده المسكين وكيف يحصل على أمواله بالإنجليزي البسيط..
هذا الرجل البسيط كذلك كما الإنجليزي أعلاه، وضع تعليم ابنه ضمن أساسيات الحياة وابتعثه خارج منطقتهم الفقيرة ليتعلم ممتثلاً لفهم جميل متنازلاً عن أشياء بدت صغيرة أمام تعليم ابنه.
يفتح الولد (الاسبيكر) ويبتسم بهبالة وجهل يسأله والده: أها قروش الشيء القلتو داك وصلتك؟
يجيب ود السرور: ااي يابا قروش (الإنموشن) وصلت، إلا دايرين مننا قروش (الأتندس).. دي مواد بنشتريها من السوق وبنعمل بيها مركبات لوجستية.
والده: خير يا ولدي، في السخلة الرقطة دي، ببيعها وبرسل ليك قروشها.. ربك كريم.
يستمر الكلام الفارغ من جانب الابن، وتنتهي المكالمة، فيبدأ ود السرور يحكي لزملائه عن جهل والده وناس الحلة وكيف باع والده أغنامه غنماية غنماية، مرة عشان عندهم (نورمل) ومرة عشان عندهم (كومنت)، وكيف كانت بدايات والده مع استخدام التلفون وأبجديات التكنولوجيا.
اتفرجتوا..
ما غلطان إنت والله، غلطان أبوك الما قيم الغنم..
أمثال هذا إما أنهم يتلقون تعليم عدم التربية أو تعليم عدم الأخلاق وكورسات مكثفة في استئصال الإحساس.
والله جد..
في خواتيم الفيديو المبارك قال له أحد زملائه: ياخ والله الكلام دا ما صاح منك.
فـرد: أكسر الحنك يا عمك.
مر علينا التعليم الما بستفيدوا منو، لكن التعليم البودي الزول لي وراء دا، نسأل الله السلامة.
الموضوع خطير والله..
لما (تتفلسف) بي قرايتك على أمك وأبوك… أعرف إنك ما قريت البتة.
لما تضحك عليهم عشان ما بعرفوا يستخدموا تكنولوجيا معينة، اتذكر إنهم علموك كيف تمشي، كيف تأكل وكيف تستخدم الحمام.
ما تخليني أقول ليك (عولاق دا).
أي واحد من هؤلاء (التعليم، الحب، النجاح) إن لم يزدك تهذيباً وتواضعاً وإحساساً بالآخر، أعرف إنو البامية ما ياها.
والله جد..
أقول قولي هذا من باب وجعة الموضوع.
ودايرة أسألك سؤال واقف لي هنا: عدم الدم عرفناه، لكن دا إنجليزي ليك؟!
و……….
يا من عدا ثم اعتدى ثم اقترف
ثم انتهى ثم استحى ثم اعترف
ابشر بقول الله في آياته:
(إِنْ يَنْتَهُوا يُغْفَرْ لَهُمْ مَا قَدْ سَلَفَ).