قصيدة جديدة : المطرة .. والناس .. والخريف
موسم من الخيرات وصل..
والمويه شريان الحياة..
بتجينا يا ناس بالمطر..
أصلوا الموازين في الوجود
موجودة من خلقو البشر!
ويا مطرة كُبي لينا
صُبي فينا
ورشي مويتك في الجنينة
وبللي الطين والشجر..
وطوفي في سودانا طوفي
جودي بالخير والثمر..
ما مطر جايينا من رحمن كريم
بيرزق الدود في الحجر..
يا ربي.. يا مجري السحاب
سودانا أصبح في خطر
وقيهو من شر المصاب
واحميهو من شر البشر!
وحد صفوف الناس جميع
ورينا كيف ناخد الحذر..
نتلم كلنا في نفير
ونبدا من هسه العمل..
ونبلش النوم والشخير
ونطرد الهم والكسل..
راجينا يا ناس الكتير
خلونا نحيا على أمل..
نعمّر البيت الكبير
والفاتنا يرجع للأهل..
والمطرة لو شالت بيوتنا
نبنيها ولو طال الأجل..
والابتلاءات العظيمة
ماعندنا بتعني الهزيمة..
والكوارث جد أليمة
لكن مسطرة في القدر..
بلدنا تدخل في امتحان
والمرء يكرم أو يهان..
والله من إكرامو لينا..
في ده الخريف قال يبتلينا
ورغم الكوارث والخطر..
برحمنا رب الكون رحيم
ويجازي للعبد الصبر..
والصبر مفتاح الفرج
والفرج داير عمل
والأمل في الهمة
في الناس والعمل..
بكرة الحقول تخضر بي خيرها الوفير
كل السواعد همة في لمة نفير..
العازة تحلم بالعديل
وخير بلدنا يا جنيات كتير..
مهد الحضارات – جد – بلدنا
معروفة من غابر السنين..
فرطنا فيها وانخذلنا..
بس بالحنين..
بي حبها وتقديرها
بي الرجل الأمين..
نمسك مفاتيح الحياة
ونعلي في الدنيا الجباه..
يدفق النيل خير عميم
وكل زول يصبح هميم..
ويفرحوا الأطفال
يغنوا: المطرة جات
وطعم بلدنا
زي سكر نبات..
وأولادنا يكبروا
وبالحلال..
يتأهلوا ويشيلو البنات..
ولقمة المؤمن بي ربو
حلوة لمن تنقسم
وأحلى لو أداك بقلبو
إنت تأكل مبتسم..
آسي مكلوم الكوارث
والمعذب ومنهزم..
خليهو يمرق من مصيبتو
يكتمل فرحو ويتم..
ومن كبوتو..
يقيف يعاين لي الشروق
ودمعو المعكر بالمحبة
بكره لا بد بيروّق..
وكل جائع في أهلنا
يستحق لقمة طعام
ولقمة المؤمن بي ربو
حلوة لمن تنقسم
وأحلى لو أداك بي قلبو
إنت تأكل ومبتسم..
وطفلنا الهايم نلمو
وقبلما ياكل ويشبع..
نفتح الأحضان تضمو..
شان يحس طعم الأمان
شان نعوّضوا فقد أمو..
وكل زول يفتح لي بوابو
وأي واحد يبقى والدُه..
ويبقى عمو..
ولما يحصل كل ده
سودانا يتخطى الصعاب..
ونشرئب للدنيا ننظر للسحاب
بالفرحة نترجى المطر
وما يهمنا السيل والخطر..
