"كمال ترباس" يعود إلى (خج) الساحة من جديد 2-2 :

رغم أنه معروف بتعليقاته الساخرة ولسانه الحاد جداً و(جخاته) التي تشعل الوسط الفني… إلا أن الفنان “كمال ترباس” يصر دوماً أن لديه خطوطاً حمراء لا يتعداها في نقده العنيف للظواهر التي تطفو في جسد الساحة الفنية… خطوط حمراء تتمثل في الرموز الفنية أمثال “وردي” و”محمد الأمين و”عركي” و”صلاح مصطفى” وغيرهم.. دائماً ما يؤكد “ترباس” أن هؤلاء يمثلون الوجه الأبرز والأجمل في الساحة.
 “ترباس” يملك من الذكاء الفطري ما جعله قادراً – دون غيره – من مطربي جيله أن يحافظ على نجوميته الفنية رغم تمدد نجومية المطربين الشباب، ظل “ترباس” رقماً لا تخطئه تقديرات المشهد الفني… التقته (المجهر) وأدارت معه حواراً حول بعض القضايا الفنية:

{ ولماذا انتقدت “الموصلي” رغم أنه لم يأتِ بسيرتك؟
–    “الموصلي” قال انو (لزمة) موسيقية واحدة منو بكل ألحان “بشير عباس”… و”بشير عباس” تاريخ ورقم في الموسيقى السودانية… و”الموصلي” لا بقى (غناي) ولا وصل (كلاي)… وهو بيقول عن نفسو انو فنان… “الموصلي” ده كان بيغني معاي فنان شعبي.
{ طيب و”عثمان مصطفى” مالك معاهو…؟
–    أنا “عثمان مصطفى” بحترموا جداً… وهو قال إنو “ترباس” ده عمة ولسان بس…. وهو (لا لبس العمة ولا وصل القمة)… وأنا والله ما سألتو.. وأنا ما أترشحت لرئاسة اتحاد المهن الموسيقية لانو لما قالوا لي أترشح رفضت.. واترشحوا ضدو ناس… وقال لي عامل نفسك منو ومنو.
{ “ترباس” كانت تجمعه علاقة وطيدة بالراحل (الحوت)… هل تعتقد أن الساحة الفنية شغرت برحيله..؟
–    أيوة الساحة بقت فاضية برحيل (الحوت)…لأنو “محمود” عندو كاريزما عالية وعندو قبول… والقبول ده من رب العالمين… و”محمود” ده لو طلع المسرح ساي عندو قبول وهسه في فنانين بحاولوا يصلوا عن طريق “محمود” ويكسبوا جمهورو…. لانو عارفين انو جمهورو ما بيجامل نهائي.
 { وكيف كانت علاقتكما معاً..؟
–    “محمود” زول محترم جداً.. وما كان بيناديني غير بي أبوي…. زول ربنا أداهو حنية وقوة وأخلاق… وبعض الناس مفتكرين إنو “محمود” ده مصنوع… ويوم النعش بس كان استفتاء لانو كان زول قلبو طيب جداً… لكن للأسف كان في بعض الناس حوالينو بشتغلوا ضدو وهو كان عارف الحكاية دي…. بس هو كان زول عطوف ومتواضع جداً.. وكان بفتش عن (الشماسة) ويأكلهم من يدينو ويسأل منهم واحد واحد.
{ أبرز ملامح وصفات “محمود” شنو..؟؟
–    “محمود” كان زول قوي جداً وصاحب شخصية قوية جداً… وما في زول بيكسر ليهو كلامو.. وفنان شباك…. وهو فقد كبير للساحة الفنية.. وفي فنانين بغنوا عشرات السنين وما لقوا (1%) من اللقاهو “محمود عبد العزيز” ربنا يرحموا.
{ رحيل عدد من الفنانين المهمين مؤخراً أثر بشدة على الساحة.. ما هو رأيك..؟؟
–    نعم والآن الفنانين الفي الساحة الفنية بقوا كم..؟؟
{ “ترباس” رغم لسانه (العنيف) جداً إلا أنه لا يمس به رموز الغناء السوداني..؟؟
– نواراتنا ورموزنا فاتوا ورحلوا.. ولا يمكن أهاجم هؤلاء الرموز… ولكنني أنبه الناس إلى الالتفات لهم لان بعضهم يعاني بشدة… هسه “صلاح مصطفى” عيان، وأيضاً “محمد الأمين” و”صلاح بن البادية” ربنا يديهم العافية… ديل ثروات قومية مفروض الناس تحافظ عليها، و”حمد الريح” ذاتو ربنا يديهو الصحة والعافية.. وكل ما كان بيننا راح إلى سبيلو… وهو زول فنان وعندو بصمتو المهمة في الساحة الفنية، وما يفوتني أذكر “أبو عركي البخيت” اللي هو أكتر زول حنين في الدنيا… ولما تحصل حاجة بتلقاهو أول زول وصل… وأنا من هنا بناشد كل الناس انو يلتفتوا إلى رموزنا الفنية لأنهم بيعانوا بعد أن رحل بعضهم وحتى الموجودين قنعانين من الحاصل… وبرضو ما يفوتني أذكر الفنان الكبير “محمد ميرغني”.. والفنان العائد “الطيب عبد الله” صاحب البصمة الواضحة واللي الناس بتطالبوا بالجديد وأنا بفتكر انو قديمو جديد.
{ أخيراً أين سنرى “ترباس” في رمضان..؟
–    احتمال ما اشتغل في رمضان.