سلام:لارنجه بت صديق
(الاهداء الي روح شقيقتي وصديقتي وحبيبتي نايله صديق الملك)
سويتلك عقد وقويشه
من انضر بلح قونديل
وساهرت ليل بي حالو
شان انسج من السعف اكليل
يليق بي راسك المرفوع
ونصبتك اميرتي عدييل
……………………
وسريت يانايله
بين (مساوي) و(الحلفايا)
ذاكرت الجذور وبكيت..
وركيت في شراع مركب
قصاد بانت في عرض النيل
صرخت من الوجع مجروح
اه يانايله نار فقدك شوتني عديل
فاض ابوعنجه بي دمعو
نزل مطر الرماد يانايله
واتحكر في شارع الفيل
وقع سوق بانت المهدود
برك من حزنو غلبو الشيل
……………….
اه يانايله بتذكر ونحن صغار
لعبنا سوا
مشينا سوا
ضحكنا سوا
نتسابق في عرض الحوش
تقول اندر جنس في الخيل
لعب البلي يانيلي
والكوتشينه
كمان حرينا
تقولك امي بت جنه
دحين يانايله انتي ولييد؟؟
ده امر عجيب
وتضحكي ذي وتر عصفور
تقوليلا ده هاشم اخوي
قريب وحبيب
ماهو غريب
…
أغمض وتجري تدسي.
افتش ليك ورا الأبواب
وفي الديوان
وفي الاركان
وكل البيت
وجنينه الوالد الوارفه.
ابوي صديق
واخوك كان في الصغر عفريت
امثل اسأل عنك الحنه
اقول ليها وين نايله مدسه؟؟
تتضاحك وتتمايل
تقول
مرت هناك هسه
اسأل ابوك صديق واسأل أمنه بت جنه
واسأل عنك الفله
اقول ليها وين نايله مدسه
تقول ماعارفه
كت نعسانه
اخدت لي غمضه
واسأل
والياسمينه والجوافه
والريحانه والليمونه
واللارنجه.. اللارنجه يانايله
افتش ليك افتش ليك
أقرب اسأل الحله
واسمع ضحكك المكتوم
تراك يانايله فووق في
النيمه مدسه
وتنزلي لي
واجري عليك واقبض فيك
ونضحك من قلب مفتوح
في زمنا أصيل ونبيل
…
اه يانايله اسع وبين
جنينه الوالد الوارفه
تصبح فيك
تمسي عليك
حل محلها
السيراميك
كضاب ذي كتير من ناس
يبهر فيك
يضحك ليك
يلمع ليك
يطمن فيك
وفجأة يزلقك
يرميك
يكسر فيك
يدشدش فيك
…………………
اتذكر مشينا السينما
متماسكين
وكم مشوار مشينا سوا
رقيصنا سوا في
أعراس الاهل يانايله
فرحانين تقول طايرين
…
واتذكر سفرنا سواء
مع الوالد واخوي حسن
للختميه في كسلا
حليل ناسها وحليل أهلها
نطلع للجبل جارين
نصل توتيل
لابنفتر ولااا فد مره
مات الحيل
واتذكر في القطر راجعين
شكلنا سوا
منو البقعد علي الشباك
يعاين للخلا المفتوح
جميل أخضر
يرد الروح
محطه تجي محطه تروح
والمشهد
يشد عينيك ويشد الحيل
…………………..
واتذكر صباك يانايله
والمنسج
هديتك لي طاقيه
وكم في مره طرزتي
هديتك لي كان منديل
كان ابيض متل جواك
عزييز وجميل
………………..
اه يانايله
بعد هاجرتي لي مدني
بتذكر
كل صباح يرن الهاتف المحمول
واسمع صوتك الرويان
بالحنين مغسول
تسابقيني
_هاشم اخوي ود أمي
صباح الخير
اه يانايله من قوله
صباح الخير
وهاشم اخوي
مابتشبه صباح الغير
تجي الكلمات من قلبك
تسالم في شغاف الروح
ماحسيتها من حلقوم.
كل صباح
بيتنفس صباح بانت
علي صوتك
واحسك جوه في قلبي
واعيد كلماتك الطيبه
هاشم اخوي ود امي
واشكيلك عذاب عمري
تصبري فيني
وانتي الصابره يانيلي
تمليني
كتير من أجمل الاوراد
وكم آيات من المصحف
وتوصيني
علي التسبيح
واضحك ليك
واغني معاكي يانايله
( لسه الدنيا مازالت بخير)
صباح الخير
علي (دردق)
علي (بانت)
صباح الخير
وهسع وين هي يانايله؟؟
اتلاشت صباح الخير
وانو الدنيا لازالت بخير
…
مسيخه الدنيا اصلو زمان
بعد فقدك
بقت امسخ
كمان وكمان
…
حتي الثوره يانايله
ذي صابونه إتماصت
بقت بروه
راح هدرا
دم الصبيان.
…
ما أحزن صباح بانت
بدون صوتك
وما اتعس كمان الهاتف المحمول
واهي الدنيا
عدم وفصول.
………………..
يامحمد يامهند
ويامصعب.
أوصيكم :
بس ادوني من دولابها
فد طرحه
تعزيني
تصابحني
تمسيني
ادفن فيها نار حزني
واسمع من خيوطها الصوت
– صباح الخير
هاشم اخوي ود امي
هاشم اخوي ود امي
………………….
سلام( دردق)
العاشقاها (بت صديق)
ياجيرانها خمسه عقود
في الفرح والضيق
سلام ياصحبه الاوراد والاذكار
سلام ياصحبه التسبيح والقرآن
والترتيل
سلام لي كل ركن في الحي
سلام ياناس جزيره الفيل.
…
سلام ياضريح
( لارنجه بت صديق)
(ترب) مدني
ماجاور (لحمد النيل)
…
سلام يامدني
تربه ونيل.
…………………
سويتلك عقد وقويشه
من انضر بلح قونديل
وساهرت ليل بي حالو
شان انسج من السعف اكليل
يليق بي راسك
المرفوع
ونصبتك
اميرتي عدييل
…
سريت يانايله
بين مساوي والحلفايا
ذاكرت الجذور وبكيت
وركيت في شراع مركب
قصاد بانت في عرض النيل.
٢٠٢٠/١١/٥
أبوظبي
