“ندى القلعة”: حملات (تخوين) الفنانين ما بتودي البلد قدام
الخرطوم_ المجهر
استنكرت الفنانة “ندى القلعة” هجوم البعض على الفنانين الذين قالت: إنهم يمارسون مهنتهم التي يأكلون منها عيش، ويصرفون بها على أولادهم وبيوتهم. وأوضحت “ندى” في حديثها لـ(المجهر) أمس: (ده أكل عيشهم بيكون في الغناء وكتير من الناس بتمارس عملها.. ليه الموضوع يقيف على الفنانين بس.. ولو الناس دعوا الفنان انو يتوقف عن ممارسة مهنتو من باب العدالة أن يتوقف المهندس والمحامي والصحفي عن عملو)، وتابعت “ندى”: (في بعض المرات نضطر للغناء في ظروف صعبة جداً لأنو الفنان بيكون مرتبط بعقد بينه وأهل المناسبة)، وتساءلت: (هل يسعى البعض إلى أن يدخلوننا إلى السجن بعدم الالتزام بالعقود .. ولو دخلت السجن ح يجوا يصرفوا على أولادي؟)، وأضافت “ندى”: (الناس لو ما قبلت الآخر وابتعدت عن تخوين البعض البلد دي ما ح تمشي لقدام، والناس بتقدر الظروف دي لأنو بكون مرتبط بعقد، وهل أنت عايز تدخلني السجن؟)، أتمنى الثورة تكون لمصلحة الجميع والفنانين ده مصدر رزقهم والفرق البيني وبينك أنا بغني وما معناها أنا فرحانة.. قبل كده غنيت لكسلا أثناء ما ناس كسلا كانوا بيموتوا .وتابعت “ندى”: إذا كنت أنا مطربة خائنة معناها ناس المناسبة ذاتهم خائنين بالمنطق الأعوج ده.. لأنو فيه ناس قدرما فقدت أولادها عايزة تفرح بأولادها التانيين.. والبيتكلموا عن الحُرية لازم يمنحوا الآخرين حُرية الرأي الآخر.. وزادت: (أنا بحب السودان وده بعيد تماما عن السياسة وبعرف اعبر عن وطنيتي بالكيفية البشوفها مناسبة).
