#بعد دا الناس مفروض تستغرب لو الكهرباء جات.
الأصل في الكهرباء القطوعات.. وكونها تجي دا الحدث..
ثم الأسخف من قطع الكهرباء (منشورات) قطعت جات الكتيييييييرة على فيسبوك..
سخانة جيب وسخانة جو وبعوض وعدم كهرباء ومدرسة تعليم الرومانسية..
دا كلام؟!
……..
#طالعت على (المجهر) الأسبوع الماضي إعلان الصحة عن (ضبط 300 طبيب مزيف بولاية الخرطوم)..
ما (3) ولا (30)، بل (300)..
وفقط بولاية الخرطوم.. يا جماعة دي مصيبة شنو..
هي الناس من الطبيب الأصلي تلاوز.
بعد هذا العدد (300 طبيب مزيف) سوف يظهر مرض (فوبيا الطبيب المزيف).
بيئة (صحية) منتهية.. علاج بسعر خرافي.. و(300) طبيب مزيف.
ربنا يكون في عون العيانين والأطباء الحقيقيين..
نسأل الله السلامة..
……..
#أرادت حبوبة جيرانا أن تهون على ابنتها وتواسيها فقالت لها: (مفروض يا بتي ما تبكي وتزعلي على المشكلة دي ما عشان هي مشكلة وبتروح ولا عشان مشكلة بسيطة، عشان يا بتي المشكلة الجاية لما تجي ما تجي تلقاك زعلانة).
اتفرجتوا؟!
منطق برضو..
زمان الناس بتزعل من المشاكل هسه المشاكل بتزعل من الناس الزعلانين..
…….
#يعتقد البعض أنك لو متضايق مفروض ما تفتح تلفونك وما تأكل وما تشرب وما تطلع إلا وإنت بني آدم كويس وبتدلع..
……
#البنات أكتر واحدات بعرفن متين وكيف وما هو الوقت المناسب لطلب القروش من الآب..
خطيرات في هذا الموضوع الخطير.
والله جد..
و……..
سهرنا يا ليل
