فك الحظر
الأستاذ الهندي
..تحية واحتراما
..اسمح لي مشكوراً بنشر هذه المقاطع جادت بها القريحة عقب قرار فك الحظر.
إنفك الحصار.. والباقي لينا كتير
خلونا نبدا نفير.
من راس البلد..
دايرين نعدل الميل..
انفك الحصار
والباقي لينا كتير
وأرضنا البراح
والله كلها خير
بس عاوزة السواعد
شان نبدا للتعمير
والبنيان صعب
وما أسهل التدمير
وقبال نبدا خطوة
ونحسن التدبير
حسن الظن أخير
لو فينا أو في الغير
والداير الخلاف
والبسعى للتدمير
ما سوداني مننا
واحد خسيس وعميل
صلوا على الحبيب
يا أهلنا صلوا كتير
نبداهو النفير
نبداهو من النيل
ونسألو للسماح
قصرنا نحن كتير
ومن الليلة نحلف
كل قطرة جارية
تسيل نسقيها تراب
باكر بنحصد خير
تخضر الحقول
من كل ثمرة نشيل
وهيا على الفلاح
صوت المؤذن صاح
خدروا للبطاح
سودانا خيرو سماح
وما ننسى النفير
داير عمل وكفاح
ويا غندور سلام
ليك من أخوك
تحية وعفارم عليك
بيضت أنت النية
وكان هم البلد
عندك أهم قضية
زينت المحافل
وجيت شايل القرار
قدمتو لينا هدية
واصل في مسيرك
مرحب حباب الجية
وللغايبين سلام
وكيف حالكم هناك
وكيف الديار البرة ؟
كم طال الغياب والغربة
وأصلها مُرة جاكم صوت
نفير العازة مرقت برة
دايراكم تجو
عرق السواعد حر
ويا الخرطوم سلام
جاكي الفرج من برة
ويا المهدي الإمام
أفرح نضالك درَّ
ولو عادت سنين
كم عشنا فيها المُرة
الجايات رباح
خير الوطن بنشر
أتباهى وأفاخر
بيك يا وطن وأغني
يا وارث الحضارة
مصدر ثقافتي وفني
شاهد الله الكريم
تسلم دوام متهني
التجانى حاج موسى
