فوق رأي

هاشتاق الخميس
هناء إبراهيم

#رداً على سؤال (لماذا لا يتبرع الرجال لزوجاتهم؟!) وصلتني إجابات كثيرة واحتمالات أكثر عبر البريد الإلكتروني وفيسبوك.. إلا أن ثمة إجابة تكررت بشكل كبير على سبيل المزح ربما وهي قولهم (عشان يلقى طريقة يتزوج إبان مرضها أو بعد وفاتها)…
على أساس وهي نصيحة ما بتزوج..
#في مشهد رائع جداً أوقف الأب مراسم زواج ابنته وذهب لإحضار (زوج أمها) حيث مشى معه على الممر حتى أوصلاها مع الود والورد إلى العريس.. قال الأب إن زوج والدتها ساهم معه كثيراً في تربيتها..
شايف كيف؟!
#مرات لما الزول البتحبو يستخدم مفرداتك.. بتتبسط جداً… بتحس إنك (هكرتو)..
والله جد..
#كمية حفر في الشوارع تخلع وتخوف.. التقول ناس الطرق حالفين يطلعوا إبليس من تحت الأرض…
إنتوا عندكم شنو تحت؟!
مالكم مع الشوارع دي.. عذبتوها وعذبتونا.
#عندي إحساس إنو (الواتساب) في التحديث المقبل ح يجاوبنا على سؤال الأغنية السودانية الشهيرة (إنت صاحي ولا نايم.. ولا طرفك من طبعو نعسان).
ح يورينا إنت صاحي ولاّ مستهبل ساي.
اعتقد ذلك..
#لما قال: (مالو بدر السماء ما شروق
مين حماهو ومنعو المروق
خدو زهري وبسمو البروق
غير أشوفك أنا ما بروق)..
كان عارف إنو في ناس مهدئات.. تشوفن تبقى رايق ومرطب وبالك طويل وصوتك سمح..
والله جد..
#الجروح الكتيرة البتروح سريع دي مشكلة كبيرة.. لاحقاً ح تتعبنا جداً وترهقنا نفسياً وتسل روحنا دي.. مثلاً عضة القطة تشكل خطورة شديدة نسبة لأن أسنانها صغيرة وحادة وهذا يجعل الجرح يلتئم سريعاً وبالتالي يحبس البكتيريا تحت سطح الجلد..
#ولازال العالم لم يفهم فهم ذلك الشخص الذي يتصل عليك وتخبره أن الرقم غلط فيسألك طيب منو معاي؟..
إنت مالك مالي..
#البني آدم البحبك بتضايق من اتفه الأسباب ما عشان متحايل.. ما عشان زهجان منك.. ما عشان هو نكدي.. عشان شايفك إنت براك في كفه.. شايفاك براك إنت ناس..
و…….
إنت ذاتك زول أجمل من المعقول..