بحب "الأنتينوف" وبموت في "الصين" وبكره "إسرائيل"!!

– 1 –
{ علمت أن البروفيسور”ابراهيم غندور” في زيارة إلى جمهورية الصين الشعبية على رأس وفد من أمانة العلاقات الخارجية بالمؤتمر الوطني. بعدها قرأت أن والي الخرطوم الدكتور “عبد الرحمن الخضر” قد يمم شطر “الصين” أمس الأول وبصحبته عدد من أركان حربه ومعتمدي بعض المحليات، تاركين الخرطوم غارقة في البرك والمستنقعات!! ثم سألت (أمس) عن موظف كبير بإحدى الوزارات، فقيل لي إنه في (رحلة عمل) إلى الصين!!
{ أغلب (ناس الحكومة) يا إما في الصين.. يا.. ماشين ليها.. يا جايين منها..!! بعملوا شنو في الصين.. أنا ما عارف!! بترول وشالوا (الجنوبيون).. وحنفيات ولمبات ضاربة.. ومبيدات (درجة عاشرة)، و(الفيتو) يحرم علينا!!
{ العبد لله مشى “الصين” مرة واحدة سنة 2007م وقرر ألا يكررها من شدة وعثاء السفر.. ومرمطة (الكونكشن) في مطار “دبي”، خاصة إذا كنت قادماً على متن الخطوط (الإماراتية).. ولم تدبر تأشيرة دخول للإمارات، وحجزاً بأحد الفنادق في حالة لم تنبهك (الخطوط) أو (السفارة) لإمكانية الوقوع في (مطب) أرضي.. لا (جوي)!!
طبعاً المطبات الجوية دي متخصصين فيها (بتاعين الأنتينوف) العندنا ديل!! الله يغفر ليهم.
– 2 –
{ كيلو اللحم (الضأن) في “الخرطوم” بـ (50) جنيهاً (خمسين).. وفي بعض (الأحيان) و(الأحياء) بـ (60).. (ستين) يا “شيخ علي” .. الرئيس مشى إيران.. وكيلو اللحم أهم من مؤتمر (الحركة الإسلامية).
{ الخروف في إثيوبيا (القريبة دي) بـ (300 بر).. يعني (150) جنيهاً، وما زاد بعد “مليس” مات!! يعني يساوي سعر (3) كيلو لحم من الخرفان (الحمرية) و(الكباشية) في بلاد (المسافرين طوالي إلى الصين)!!
{ يعني حل مشكلة أسعار (اللحم) الخرافية دايرة سفر للصين.. وللا إثيوبيا؟!
{ كمان جابوا ليهم (برازيل) الأيام دي!!
{ قال تقشف.. قال..!!
– 3 –
{ معلومة خطيرة جداً ذكرها وزير الصحة الاتحادي “بحر ادريس أبو قردة” في متن حواره مع جريدة “الصحافة” قبل أيام، الوزير قال إن البلاد تعاني من أزمة في توفير الكوادر الصحية المساعدة لدرجة أن عدد (الأطباء) أصبح (أضعاف) عدد (الممرضين)!!
الوزير كشف أنه مقابل كل (6) أطباء عندنا ممرض (واحد)!!
{ عشان كده.. المستشفيات ما فيها زول بعرف (يطعن حقنة).. أو يركب (فراشة درب)!! واعملوا حسابكم ما ينفجر ليكم (وريد).
{ الوزير الاتحادي طالب بوقف التصديق لكليات طب (جديدة)!! وكلامو صاح. رأيك شنو يا بروف “مامون حميدة”؟! يا أخي ما تفتح ليك (كلية تمريض) في جامعة (العلم والجمال)!! والقبول للكلية دي يكون بمواصفات (خاصة).. و(قروش كتيرة)!! أهم شئ تكون القروش كتيرة عشان يقدموا ليها (ناس كتيرة)!!
{ حدثني أحد الأساتذة الجامعيين أن القبول لكلية الطب البيطري بإحدى جامعات الولايات، وهي (تاني) كلية في السودان، ولا ثالث لها.. انخفض إلى نسبة (50%) لعدم وجود راغبين!! مع أننا في حاجة ماسة جداً لأعداد كبيرة من (البياطرة) لمراعاة ثروتنا الحيوانية (الهائلة) حيث الخروف (أبو مليون)!! مثل حاجتنا لممرضين يعرفوا (يطعنوا حقنة) ويشيلوا الدم (من الوريد).. ما من (الشريان).
– 4 –
{ عزيزي “باقان أموم”.. مكرر صديقي (سابقاً) “دينق ألور”: يقبع – الآن – بأحد سجون “الخرطوم” زميل (إعلامي) يعمل في قناة عربية (طويلة اللسان) غزيرة (الدولار)، وهو من رعايا دولة (الجنوب).. كان من مواطني دولة السودان (الواحد الموحد) قبل أن تنقضوا عليه برفقة زملائكم في (قطاع الشمال) فتقسمونه إلى (قسمين).
{ الزميل محبوس لحين السداد بأمر المحكمة – ولا شك أنكم تحترمون القضاء وتراعون حقوق الإنسان – وذلك لعجزه عن سداد (نفقة) أولاده من مطلقته (السودانية)، وقد بلغت المديونية نحو (109) آلاف جنيه سوداني!!
{ أرجو أن تسارعوا إلى سداد الـ (18) ألف دولار من أحد حسابات عائدات البترول (القديم) خصماً على ميزانية (قطاع الشمال) أو من أقرب حساب في “كينيا”.. مع تحياتي.
– 5 –
{ هناك (موضة) منتشرة هذه الأيام.. يا تعمل (دكتوراة).. يا تبقى (بروفيسور)..!! والله.. واحد (دكتور) – من إياهم – رسل لي مقال يسبح في الأخطاء (الإملائية)، وبرضو (دكتور)!! قبل يومين قرأت خبراً بإحدى الصحف وصفت فيه أحدهم بـ (البروفيسور الشاب)!! ما قادر أفهم.. كيف (شاب) وكيف “بروفيسور”؟!
{ يا حليلك يا “عبد الله الطيب”.. كان ديل (دكاترة) و(بروفات).. إنت شنو؟!
– 6 –
{ حدثني أحد أصدقائي ممن أثق بهم، أنه صادف متقاعداً ذا صلة بأحد كبار النافذين في الدولة بصالة (كبار الزوار) بمطار الخرطوم قبل أيام – سبقت حادثة تلودي – وبعد السؤال عن الحال والأحوال، ووجهة كليهما، حدثه (قريب النافذين) بأنه في طريقه إلى “روسيا” مع آخرين لشراء طائرات!! يا ساتر أستر.
{ وطبعاً حتكون (أنتينوف).. عشان المقاطعة وكده!! أنا متأكد لو أمريكا رفعت المقاطعة.. الجماعة ديل ح يقولوا ليها (ما دايرين)!! نحن بنحب “الأنتينوف”.. وبنكره إسرائيل!!
{ مع تحياتنا للمطرب المصري “شعبان عبد الرحيم” وهييييه هيه!!