ربع مقال

طبق اليوم.. “كيكة السلطة”!!
خالد حسن لقمان
يبدو أن من أهم إيجابيات المراحل الأخيرة التي مررنا بها كسودانيين أننا استطعنا أن (نفك الضحكة) ونرسم الابتسامة علي وجوه بَعضنَا البعض، هكذا على سبيل محاولة التغلب على ما نواجهه من صعوبات في الحياة، ومن بين ذلك وصلتني بالأمس الوصفة التالية لكيفية عمل (كيكة السلطة):
– مدة التحضير: من سنة ونص إلى 3 سنوات.
– مدة الطهي: 30 – 40 اجتماعاً تحضيرياً. 
} المقادير:
– نص دستة أحزاب.
– كيلو ونص دقيق “شعبي” وده مهم للنكهة.
– كوب كبييييييييييييير زيت أمريكي لأنو “بسخن سريع”.
– رشة ملح تصريحات.. ملعقة صغيرة.
– ربع ملعقة وعود.
 – حبة لقاءات تنويرية في القنوات الفضائية وكم كيلو شمار صحفي.
– ربع لتر من عصير “التنازل” من بعض الوزارات.. لأنو لو كترتيه الكيكة بتبوظ. 
} طريقة التحضير النهائية:
– اضربي المقادير دي كلها مع بعض لحدي ما تنجض نص استواء.. بعد داك تتقطع مخرجات صغيرة صغيرة، وبعد داك تخليها في الشمس كده زي ستة إلى سبعة شهور “عشان تتماسك، وقبل ما تقدميها اهتمي بمنظرها.
يعني لفيها في ورق مناقشات ومفاكرة عشان تتمضغ مع بعض بسهولة.. وممكن تشتغلي عليها تصريحات وتسربيات عشان النكهة والطعم.. وبالهناء والشفاء.