ربع مقال

مليون ونص غير شرعيين..!!
خالد لقمان
.. هل تصدقون أن هنالك الآن داخل هذا البلد الذي نعيش فيه (بلدنا نحن السودانيين ديل ) عدد مليون و(500) ألف من الأجانب من مختلف الجنسيات التي تنتمي للأقطار والبلدان العربية والأفريقية والآسيوية الذين منهم الأثيوبيون والأريتريون والصوماليون والهنود والبنقالة والصينيون والكوريون والباكستانيون وغيرهم.. وغيرهم  دخلوا البلد ويعيشون معنا الآن بطريقة غير شرعية؟!.. هذا ما نقل عن  اللواء “يس محمد الحسن” – مدير دائرة شؤون الأجانب بوزارة الداخلية خلال ندوة بعنوان: ( الوجود الأجنبي في السودان ).. هذا في مقابل وجود وكما أفاد هذا المسؤول.. عدد (55) ألفاً من الأجانب يعيشون معنا أيضاً ولكن بوضعية كما قال شرعية.. (يعني يا أخوانا بالعربي كده.. مليون ونص من الأجانب دخلوا البلد وبقوا الآن عايشين معانا بطريقة غير شرعية يعني غير قانونية وكمان في 55 ألف أجنبي – معانا برضو –  لكن ديل بطريقة شرعية وقانونية ؟؟!!!!! ).. يا أخوانا الكلام ده معكوس ولا أنا منكوس وما عارف أكوس واللا البلد بقت فركوس وروووونا يا أخوانا قبل ما نصحى نلقى نفسنا في دافوس!! .. انتو عارفين يا جماعة الله أكتر حاجة أنا خائف منها شنو في الموضوع ده؟؟.. أنا بصراحة خائف يا أخوانا إنّو المليون ونص دي تكون بـ(القديم)..!!!!