حواء الطقطاقة: زمان الفنانين كانوا رخاص جنس رخصة!!

امتلأت ذاكرة الأستاذة ” حواء جاه الرسول محمد” الشهيرة بـ(الطقطاقة) وسالت محملة بصور مختلفة عن ملامح أيام زمان، وبدت (الطقطاقة) ولسانها لا ينفك يلهج بين الفينة والأخرى بكلمة (يا حليل زمان يا يمه) وكأنها تريد إعادة الماضي كرة أخرى.
 وفي معرض ردها على سؤال (المجهر) عما طرأ من تغييرات على فعاليات رمضان بين (هسي وزمان)، استرسلت في حكايات عن موضوعات شتى وكأنها كانت في انتظار من يطرق على هذا الموضوع، فلم نستطع كبح جماحها، وكانت محصلتنا من الونسة هذه اللغة (المحكية) الرائعة:
(1)
تقول الطقطاقة: رمضان زمان ما في زول بفطر في بيتو، الناس دي كلها تطلع الشارع، خاصة ناس فريقنا هنا في (حي الضباط) وبعد الفطور يتفرقوا لصلاة التراويح، ولما يموت زول في رمضان على بال ما يدفنو تكون البيوت كلها استعدت وجهزت الفطور وبعدو العشا، والشاي بالكفتيرة الكبيرة والجبنة. ولما يجي العيد الجارات يرسلن الخبيز لبعض، كل بيت يضوق حق التاني. والله كانت أيام سمحة يا بتي. لكن وييين لهسه كل زول في بيتو، المروءة انعدمت وفقدنا الترابط والحياة ذاتها كان رخية.
(2)
زمان الضبايح دي يوماتي، ومشهورين بيها ناس الشيخ “قريب الله والسيد عبد الرحمن”  يضبحوا التيران والخرفان، الناس دي كلها تأكل وتخم، هسي واحدين يقولو ليك لينا عشرة يوم لحمة ما دخلت بيتنا، حتى الأطفال كان عندهم فرحة خاصة في أيام رمضان الأخيرة، يمشوا مع أهلهم الأسواق ويشتروا الهدوم، وشدة ما الحالة كانت واحدة الراجل لمن يشتري لمرتو توب، طوالي يشتري لمرة صاحبو أو جارو معاها، الحياة يا بتي كان بسيطة شديدة، هسي العمارات ملت الواطة، زمان كانت في تلاتة عمارات بس بتاعت السيد علي والحاكم العام وإسماعيل الأزهري، وتلاتة صوالين بتاعت ناس أبو العلا عبد المنعم والشيخ قريب الله سوار الدهب عمدة الخرطوم وود كرم الله، وشارع ظلط واحد بس، وكنا بنركب الترماي بجنيه من المحطة الوسطى أم درمان، والسفر ذاتو كان ممتع كنا بنمشي أم روابة في تلاتة يوم، ونوحل في الرمال هسي السفر بقى مسيخ تلات ساعات ونصل.
(3)
لكن “الطقطاقة” عرَّجت بنا إلى الأوضاع السياسية، فتحدثت عن الفرق بين المظاهرات زمان وهسي، فقالت: منعت أحفادي يطلعوا مظاهرات اليومين ديل الكلها شفع دي، قالوا لي يا حبوبة أنت زمان كان حدك كوبر، قلت ليهم زمان كان بطلعوا معانا رجال، وفي المظاهرات بتاعت الغلاء كنا أول شيء بنقبل على الدكاكين.
وعن مناسبات الأعراس في الأعياد قالت “الطقطاقة”: زمان ما كان في كلام بالملايين، المهر كان 25 قرش بس، والفنانين رُخاص رخصة، وما كان في مايكرفونات، كان بنقطونا بـ(ريال) ومرات البدونا ليها النسوان نشيلها ونمشي، لكن سيدات المجتمع كان بدونا ختم. أما تعليم العروس ورقيصها كان في الليل بعد أبوها يمشي الصلاة، أو النهار لمن يكون في الشغل، وممنوع حضور الآباء والأخوان للرقيص، لكن وييين لهسه يا يمه الأبو يعرض مع بتو في الحفلة.