"السلطان كيجاب" لــ(المجهر) : "نميري" كان راجل (كلس) وفي عهده السباحة اصبحت اللعبة الاولي في البلد

دردشة  ــ محمد جمال قندول 
الجلوس مع السلطان السباح الشهير “كيجاب” ، ،  أو المرشح الرئاسي السابق له مذاق خاص وذلك للعفوية الجمة التي يدهشك بها في السرد لوقائع تجربته الشهيرة، فهو يعتبر من السباحين الذين صالوا وجالوا في ميادين السباحة ،وحصدوا  الكثير من الجوائز، “كيجاب” جلس في دردشة خفيفة مع (المجهر) وإلى مضابط الإفادات.
{ “كيجاب” إنت وين حالياً؟
ـــ أنا رجعت تاني “كندا” أعيش مع أولادي.
{ وليه رجعت؟
ـــ والله في “كندا” وضعي أحسن بكتير من ناحية تعليم وسكن ومعيشة، ولكني أعود للسودان في كل شتاء وذلك لارتباطي القوي بالبلاد.
{ ارتباطك بـ”كندا” متى بدأ؟
ـــ في زمن “نميري” زمن العز وأكل الوز مش زي هسي! والحمد لله اخدت الجواز الكندي سنة 79 ومنذ ذلك الوقت  بنعيش أنا وأولادي الأربعة وأمهم هناك، وولدي الكبير (ابوهير) هناك لاعب كرة سلة شهير جداً وهو فخر للسودان وموهبة.
{ زوجتك وشريكة حياتك منو؟
ـــ اسمها “مشاعر محمد” من (الغدار).
{ تزوجتها عن حب ولا زواج عادي؟
ـــ عن قصة حب عنيفة جداً.
{ أول مرة شفتها وين؟
ـــ في بيت المرحوم الشهيد النائب الأول للرئيس “الزبير محمد صالح” وهي من أهلهم و”الزبير” كان الوسيط والسبب في العرسة دي.
{ ومنو الغنى في عرسك؟
ـــ “عثمان مصطفى”.
{ بدايتك مع السباحة بتتذكر منها شنو؟
ـــ اتعلمتها في الخمسينيات علمني ليها أبوي في (الغدار) ومنها جيت الخرطوم واتعلمت في أحواض السباحة.
{ أول حاجة كنت بتعملا شنو لمن تنزل الموية؟
ـــ شوف نحن ما بنخاف ولا بنفكر في أي شيء بوتر دخلت البحر دا تاني زول عوم أنا.
{ ما كنت بتخاف؟
ـــ أبداً.
{ البحر قالوا بشيل عوامو؟
ـــ كتير قلت أنا ما عوام أنا سباح، البعومو ديل بدخلو الموية عشوائي ساي.
{ الجن والقصص البنسمعا دي موجودة في البحر؟
ـــ أي موجود الجن والشياطين في البحر وبكثرة كمان. أنا ؛، خلال وجودي في العوامة ، تعرفت على  جنية بتاعتي بي اولادا.
{ ظهرت ليك كيف؟
ـــ ظهرت لي عديل شفتها وصبحت بينا صداقة.
{عرستها يعني؟
ـــ يا زول عرس شنو؟ أنا لا قربت عليها ولا قربت علي،  بس حدها الونسة.
 { ما كنت بتخاف منها؟
ـــ لا أبداً قلت ليك نحن البنعوم في البحر ما بنخاف.
{ عاصرت الرؤساء كلهم أقرب واحد ليك صداقة كان منو؟
ـــ طبعاً “النميري” أقرب واحد لي و”النميري” من كترة ما كان بحترم القامات في البلد، جاني في أول ولد ولدتو في البيت مع مرتو و25 وزير من حكومتو.. “النميري” كان زول كلس.
{ والرئيس الحالي “عمر البشير”؟
ـــ كان منافسي في الرئاسة.. “البشير” زول كويس بس مشكلتو انو القرارات البقولا ما بتتنفذ بالطريقة الصاح.
{ بمناسبة الانتخابات الاترشحت فيها بتقول عنها شنو؟
ـــ انتخابات مارثونية أنا أشجع زول سوداني ودخلت التاريخ بخطوة الترشح ديك.
{ ليه؟
ــ كيف ليه، الناس كلها خافت إلا العبد لله ما خاف واترشح.
{ جبت كم صوت؟
ـــ أنا جبت 3 ملايين صوت، و”البشير” جاب مليون ونص تقريباً…
{ المعارضة رأيك فيها شنو؟
ـــ هي البلد فيها معارضة يعني.
{ إجابتك فيها نوع من التهكم؟
ـــ أتهكم على منو أحزاب الكشا مش ديل، معارضة مافي .
{ الحوار الوطني رأيك فيهو شنو؟
ـــ الحوار دا طوالي قائم، المشكلة مافي الحوار بس المهم مخرجاتو تتنفذ كيف؟!
{ أول مشاركة ليك في السباحة كانت وين ومتين؟
ـــ كان أول سباق لي سنة  1969 وكنت الوقت داك جديد في السباحة وفي الدرجة الثانية في ترتيب، وعندما شاركت في ذلك السباق صعدت إلى الدرجة الأولى.
{ والسباحة رأيك فيها شنو اليومين ديل في البلد؟
ـــ والله ما شاء الله السباحة في البلد دي أتطورت شديد وظهروا سباحين شباب ممتازين بس بنقصم الإعلام.
{ لكن بقت ما اللعبة الشعبية الأولى؟
ــ أكيد لظروف كتيرة منها العولمة الغزت البلد كلها والكورة السيطرت على الناس وبقت بتتذاع في أي قناة، وبعدين كمان اتحاد السباحة برضو ساهم، بالله زمن “نميري” كانت اللعبة الأولى بالبلد.
{ لو قلنا ليك أجمل مشاركة ليك هتقول شنو؟
ـــ سباق 24 ساعة في بحيرة دائرية في “كندا” واخدت جائزة (الجنتل مان).