"البشير": حاسبونا شهرياً على برنامجنا الانتخابي ودايرين جرد حساب
تعهد بإنشاء بنك خاص للشباب
الخرطوم – يوسف بشير
قطع رئيس الجمهورية مرشح المؤتمر الوطني لرئاسة الجمهورية في الانتخابات الجارية المشير “عمر البشير”، بعدم خذلان الكبار لهم، بيد أنه قال: (وقفة الشباب لها معنى خاص لأنهم جزء من الحاضر وكل المستقبل). وتعهد “البشير” لدى مخاطبته حشداً شبابياً في إطار حملته الانتخابية أمس (الأربعاء) بميدان أركويت، بإنشاء بنك خاص للشباب لرعاية وتمويل مشاريعهم، ووعد بإنفاذ برامج التمويل الأصغر وقال: (الشباب وصلوا مرحلة تصنيع السيارة والدبابة والطيارة). وأضاف: (لمن تتاح ليهم الفرصة ببدعوا، وهم أفضل عقلياً وبدنياً وروحياً من كل شباب العالم). وحث “البشير” اللجنة القومية لترشيحه بعدم توقيف عملها بعد التصويت وإعلان النتيجة، بل لمراقبة تنفيذ برنامجه الانتخابي. وقال: (الكلام البقولو عايزنو اتنفذ)، قاطعاً بأنه ليس دعاية انتخابية وقال: (عايزنو برنامج نتحاسب عليهو شهرياً مش بعد خمس سنين). وأضاف:(كل شهر نعمل جرد، نشوف عملنا شنو، ونفذنا شنو، عشان نمشي للشهر البعدو).وأبدى “البشير” عزمه الإقبال على مرحلة جديدة بندها الأول تحقيق السلام. وقال: (عايزين السلام يعم كل أنحاء الوطن)، متعهداً فيها بالحفاظ على أرواح الشباب. ودعا الشباب من حملة السلاح بالعدول عن رفعه وقال:( نقول ليهم تعالوا لكلمة سواء). وأضاف: (السودان أرضو واسعة تسع الجميع، وخيروا كتير بكفي الجميع). وأردف (ما عايزين الشباب يكونوا وقوداً للحرب بل طاقات لبناء وطن شامخ عزيز).وفاخر “البشير” باللاجئين للبلاد من الدول الأخرى، وقال: (إخوانا في جنوب السودان لما ضاقت بيهم الدنيا هناك جونا). وأضاف: (ما قلنا ليهم انتو صوتوا للانفصال، وانتو قسمتو السودان ولكن قسمنا معهم النبقة واللقمة).وجزم “البشير” بتوحيد أهل السودان ومحاربة العصبية. وقال: (الواحد لما يسألوا جنسك، قبيلتك، جهتك، عنصريتك، أقول سوداني). وقطع بأن الجهوية محاولة لتفتيت الشعب وانشغاله عن استغلال خيراته. ونبه إلى أن الإنسان السوداني مرغوب في كل أنحاء الدنيا.وأرسل “البشير”رسالة للمتحدثين عن هجرة العقول، لافتاً إلى أن السودانيين هم المقبولون والمطلوبون في كل المواقع. وقال: (الناس بطمئنوا على أرواحهم وممتلكاتهم وأعراضهم لأنو ديل السودانيين).ودعا “البشير” لمحاربة العادات الضارة في الزواج وتقليل تكلفته. وقال: (هسي البنات قالن ما مهم الشيلة، ولا الشبكة). وأضاف: (شبكة ذي البجيبوها الناس في الواتساب دي، خوفت الشباب، وخلته يتراجع). وتابع: (إن كان الزواج نتاجه ولد ولا بنت قيمتها أغلى من أموال الدنيا ليه عرسنا يتأخر).وتعهد الرئيس بتشجيع الزواج الميسر. وقال موجهاً كلامه للحشد: (واضح الشباب ديل كلهم دايرين العرس، الداير العرس يقول الله أكبر). وأضاف: (بناتنا ديل دايرات عرسان قولن الله أكبر)، قاطعاً بأن الفتيات يرغبن في رجل يعفهن ويحفظ كرامتهن.
