"كمال ترباس": قدر ما وقفنا مع الفنانين الشباب لكن ما نفع… وبقوا يركبوا عربات علي حسابنا بالأقساط…!!

رغم أنه معروف بتعليقاته الساخرة ولسانه الحاد جداً و(جخاته) التي تشعل الوسط الفني… إلا أن الفنان “كمال ترباس” يصر دوماً أن لديه خطوطاً حمراء لا يتعداها في نقده العنيف للظواهر التي تطفو في جسد الساحة الفنية… خطوط حمراء تتمثل في الرموز الفنية أمثال “وردي” و”محمد الأمين” و”عركي” و”صلاح مصطفى”.. ودائماً ما يؤكد “ترباس” أن هؤلاء يمثلون الوجه الأبرز والأجمل في الساحة.
 “ترباس” يملك من الذكاء الفطري ما جعله قادراً – دون غيره – من مطربي جيله أن يحافظ على نجوميته الفنية رغم تمدد نجومية المطربين الشباب، ظل “ترباس” رقماً لا تخطئه تقديرات المشهد الفني… التقته (المجهر) وأدارت معه حواراً حول بعض القضايا الفنية:
{ هددت في وقت سابق بأنك قد تلجأ إلى منع المطربين الشباب من ترديد أغنياتك بسبب الفنان الشاب “محمد عيسى”….؟
– نعم احتمال كبير جداً أمنع كل الفنانين الشباب من ترديد أغنياتي.. لانو الواحد قدر ما وقف معاهم لكن أغلبهم ما بيحترموا.. بيشيلوا غنانا قبل ما نغنيهو.. ويمشوا يلبسوا بيهو كرفتات ويركبوا بيهو عربات… ده كلام فارغ… أنعل أبو العربات البيدوكم ليها بالأقساط.
{ معنى حديثك أن الأغنية التي رددها “محمد عيسى” كانت سبباً في هذا المنع… أين وصل خلافك معه؟
–    أنا تاني ما بغني الأغنية دي.. كان مفروض من “محمد عيسى” يخليني أغنيها في الأول وبعد داك يقوم يغنيها… جاني وقال لي أنا متأسف… وبعد ده كلو بيجيني ويتأسف.. ده ما بيخجل ده.. ما بيحترم حقوق الآخرين… ومبارنو عازفين قايلين إنهم ممكن يصنعوا منو فنان وإنهم ح يكبروه.
{ مش كتيرة إنك توقف كل الفنانين الشباب بسبب فنان واحد؟
– نعم ح يكون هو السبب في انو ح أوقف كل الغناء… لانو عمل الموضوع قصة.. وبقوا يلبسوا ويركبوا عربات وكرفتات على حسابنا… وعشان كده أنا ح أوقفهم تماماً.
{ “ترباس” عرف بنقده العنيف لزملائه بسبب وبدونه… والناس بتقول إنك (بتاع مشاكل)؟
–    أنا زول حقاني وما بخاف لومة لائم في الحق… (والأعور بقول ليهو أعور في وشو)… أنا ما بحب استفز زول وما عندي مشكلة مع أي فنان… لا عايز أشيل عداداتهم… ولا عايز أسرق منهم إطلالة…. وما عندى شيء بخاف عليهو.. وبحترم كل رموزنا الفنية.
{ لكنك تستفز بعض الفنانين بتصريحات ساخرة؟
–    زي ما قلت ليك أنا ما عندي مشكلة مع أي زول… وما بحمل في قلبي حقد على أي فنان…
{ انتقدت “عبد الوهاب” و”وردي” بلا مبرر..؟؟
–    منو القال ليك… “عبد الوهاب” ده قال انو عايز يعمل معالجة موسيقية لأعمال خالدة… وهو منو القال ليهم انو الأعمال دي عايزة معالجة هو دكتور؟؟….أنا قلت ليهو أعمل ألحان حقتك أنت في الأول وبعدين تعال عالجها.