دراما خريفيّة .. بطولة "زوجة الوالي" (3)!!

– 1 –
– يا “علي”.. هوي يا “علي”..
{ مالك يا “حاج حسن”.. إن شاء الله مافي عوجة؟!
– والله العوجات رااااقدة.. لكن المرّة دي الجاتنا شينه تب!!
{ يا زول شفقتني.. في زول مات؟!
– لا لا.. لكن فشفاشي مهري.. ومصاريني مقطعة!!
{ من شنو؟
– كدي في الأول.. ما عندك حبّة (عُتبى) نبني بيها الحوش الوقع دا!!
{ قول بسم الله يا “حاج حسن”.. مالك بتهضرب؟!
– وللا أقول ليك.. أدّيني اتنين مليون (عتبى) نحفر بيها الأدبخانة الوقعت دي؟!
{ لا حول ولا قوة إلا بالله.. يا حاج إنت عيّان.. شابكني (عتبى) (عتبى) مالك؟!
– إنتا يا زُول ما قاعد تقرأ جرايد؟!
{ الجرايد فيها شنو؟!
– زوجة السيّد الوالي.. قالت: (الناس تعبانة.. ولهُم العتبى حتى يرضو)؟!
– هههههه.. بالله؟!
{ إتخيّل!!
– خلاص قول ليها (رضينا).. ما بيناتنا أمطار وحاجات (بسيطة) زي دي.. يعني شنو بيوتنا إتكسّرت وأشغالنا وقفت والدنيا عيد؟! أنحنا خاتين الوالي والمحليّة لـ (الحاجات الكبيرة)!!
{ زي شنو؟
– زي (النفرات) مثلاً.. وزي إزالة السكن العشوائي.. وتحويل المواقف.. والحاجات (العظيمة) الزي دي!!
{ وكمان قالت السيد “الوالي” قاعد في مكتبو طواااالي.. وحتى هدُومو بغيّرها في المكتب..
– لا حول ولا قوة إلا بالله.. حتى مكتب الوالي (مسك مويه) وما قادر يطلع منو!! المسكين تلقاهو الليل كلو يغرف وبالنهار يحاول يصلح السقف!!
– 2 –
{ التشكيل الوزاري الجديد قالوا قرّب شديد؟!
– يعني شنو؟!
{ كيف يعني شنو.. يعني وزراء حيمشو وحيجي غيرهم!!
– حيجي وزير يحل مشكلة تصريف الأمطار دي؟!
{ ما أظن؟!
– خلاص.. أنسى الموضوع!!
– 3 –
{ إنتا يا حاج.. مُمكن أسألك سؤال؟!
– أسألي.. عذبتيني بأسئلتك الطوّالي دي..
{ إنتا مش كلو سنة بتطلع ميزانيّات لموضوع الخريف دا؟!
– طبعاً.. دي حاجة معروفة..
{ طيّب بتمشي وين؟!
– يعني ما عارفة؟!
{ تكون المحليّات دي (…..)..
– أقفلي خشمك دا.. أنا مُش حذرتك مرّتين ما تجيبي اسم المحليّة في لسانك؟! عليّ الطلاق (…..)..
{ ما تمّها يا حاج.. والله نسيت.. تاني ما بجيب اسمها على لساني..
– قومي شوفي ليك شغلة اشتغليها.. هسي إنتي فرقك من المحليّة شنو؟! كرّهتينا!!
{ آخر محطة
{ غداً بإذن الله.. حسب رغبة أصدقاء (درب الكلام).. نجمع سلسة (دراما خريفيّة) في حلقة واحدة.. ونجتهد بعدها في عرض بعض التعقيبات..
تحياتي