الفنانة "إنصاف مدني" في حوار استثنائي عبر (المجهر)
أنا ما ناكرة الدين العلي بس ما عندي أملاك ولا قروش ولو ما اشتغلت ما ح أدفع
بناشد رئيس الجمهورية يتدخل يحل لي مشكلتي دي
حوار ـ محمد جمال قندول
تعد الفنانة “إنصاف مدني” واحدة من الأصوات النسائية التي استطاعت حجز مكانة كبيرة لدى الجمهور السوداني في فترة وجيزة لتتسيد الساحة الفنية، وتمضي بتجربة فريدة في غناء الدلوكة. ولكن جاءت الأقدار بما لا تشتهي السفن، حيث وقعت في مشاكل مالية كبيرة منذ أربعة أعوام ما زالت تعرقل تجربتها الفنية بصورة كبيرة منذ ذلك الحين، وتجبرها على الابتعاد، في أحيان كثيرة، عن جمهورها. (المجهر) جلست إلى “إنصاف” في دردشة كشفت خلالها عن المثير والكثير من تفاصيل مشكلتها المالية فإلى مضابطها..
{ “إنصاف” مرحب بيك؟
ـ مرحب بناس (المجهر) ومنها برسل التحايا لجمهوري وبقول ليهم كتر خيركم على وقوفكم معاي دايماً في المحن.
{ ما هي تفاصيل المشكلة المالية؟
ـ المشكلة ليها أربع سنين، وهي عبارة عن دين، وأنا ما ناكرة لكن المضايقات اللي بقت تحصل لي دي كترت شديد. وفي كل حفلة يجوا يسوقوني ناس المباحث. وفي النهاية هو دين. وأنا ما ناكرة لكن لو ما اشتغلت ما ح أسدد. ما عندي شيء أسدد بيه غير الغناء.
{ وهل تواصلين الآن في سداد المبلغ؟
ـ آي شغالة بدفع لحد هسي الحمد لله.
{ سددت جزءاً كبيراً من مبلغ الدين؟
ـ الحمد لله نعم دفعت كتير.
{ هل هم مجموعة من الدائنين أم دائن واحد؟
ـ يا ريت لو كان واحد، لكن هم كتار، وانتهى من مشكلة واحدة فيهم أقع في تانية. يعني ما عارفة أقول شنو. وبكون ماشة أي حفلة بخت نسبة (90%) إنو تحصل مصيبة. وأنا يا جماعة الخير ما عندي أملاك ولا قروش. وما عندي غير الغناء دا. يا اشتغل وأسدد، يا كمان ما ح ينفع كدا. ما معقول كل حفلة مضايقات وعساكر. دي مرة وصلت في حفلة البروف يضربوا نار. العسكري ضرب طلقة عشان يسوقني من الحفلة والجمهور ما ح يقبل تسوقوا فنانه بالطريقة دي. وأنا من هنا بناشد السيد رئيس الجمهورية التدخل العاجل. لو ما بالدفع بس يصبروا عليّ الناس ونحن نعمل تسويات. أنا فنانة وعندي جمهوري وحاجاتي البخاف عليها.
{ ماذا استخلصت من هذه المشكلة التي مرت بك؟
ـ أمانة علمتني كتير التجربة دي، ورتني الناس بشكل وكأني كنت لابسة نضارة وقلعتها، وبقيت بشوف الناس على حقيقتها.
{ من الذين وقفوا معك؟
ـ الحمد لله وقفوا معاي ناس عاديين وكتر خيرهم.
{ ومن الفنانين؟
ـ الحمد لله، “عاصم البنا” وقف معاي في مشكلة، و”حسين الصادق” كتر خيرهم.
{ هاجمت الوسط الفني في برنامج (أستوديو 5) بشهر رمضان الماضي؟
ـ آي الناس زعلت لمن استضافني “طه”، واتكلمت عن الوسط. يا جماعة أنا ما قلت ليهم تعالوا أدفعوا لي لكن يقيفوا معاي معنوياً.. يسألوا ساي “إنصاف” دي مالها اختفت من الساحة. أنا قلت ما عندهم عشرة.
{ الساحة الفنية.. كيف تنظرين إليها حالياً؟
ـ أكضب عليك لو قلت ليك بسمع أغاني، ولا متابعة الساحة. مشكلتي دي حاجباني من حاجات كتيرة.
{ جديد أعمالك؟
ـ لديّ مجموعة كبيرة من الأعمال ستكون هدية لجمهوري، اللي وقفوا معاي في الظروف دي. بس منتظرة أروق وأهدأ، وأحل مشاكلي وبوعد جمهوري إنو متى ما انتهي من مشاكلي ح أعوضهم عن أي شيء.
