حكامات جنوب كردفان يشعلن الحماس في شوارع الخرطوم
المجهر- ميعاد مبارك
الحكامات نسوة اشتهرن في غرب البلاد بتأليف الأشعار الحماسية، أغاني الاستنفار ورفع الروح المعنوية للفرسان والتغني بأمجاد القبيلة، ومدح قيم الشجاعة والكرم والشهامة وهجاء البخلاء والجبناء والخارجين على منظومة قيم القبيلة، أضف لذلك تقديم أغاني الرثاء عند فقد الفرسان الشجعان. التقت (المجهر) الحكامات “عائشة حارن”و”نعيمة حارن” ورفيقاتهن يرتدين علم السودان ثوباً وهن يحتفين بحفل تنصيب الرئيس”عمر البشير”.
حيثما كان الفرسان نكون
“عائشة” واحدة من الحكامات اللائي قدمن من جنوب كردفان للمشاركة في الاحتفال، سألناهنَّ عن سبب قدومها للخرطوم فردت بحماس كبير(نحن حيثما كان الفرسان نكون، ونحن نشجع هنا قادتنا وأبناءنا الشجعان وكل من يحتاج للدعم والحماس ننظم له الأغاني والأشعار).
اجتماع لانتقاء الكلمات
وعن كيفية كتابتهن لكلمات القصائد تقول”نعيمة”(عندما تأتي في عقل الواحدة مننا كلمات جديدة تجمع رفيقاتها للتشاور وإخراج الأبيات في أفضل ما يكون، تحت إمرة الحكامة الكبيرة التي تقود المجموعة).
زغرودة واحدة بترجع الفارس مكانه
وعن دور الحكامة أخبرتنا عائشة(الحكامة لما تقيف في نص المعركة مع الرجال وتزغرد مافي زول برجع للوراء كلهم بمشوا لقدام وبخجلوا من روحهم قدام النسوان، والزول الكعب والجبان ما بنخليه بنقول فيه الكلام البستاهله وقدام الناس وبرضوا كمان فرساننا الشجعان بنكرمهم وبنديهم حقهم).
وطن سالم وعمران
في ختام حديثهن أكدن على أن هذا الوطن محتاج للسلام والمحبة ولازم الناس كلها تبقى إيد واحدة وتخلي باله من بعض.وأبت نفوسهن إلا أن يغنين للسيد الرئيس (أنا نايمة عمر البشير السوداني قلبه حار…قاليك أمان نحن نموت رجال…دبابين في بيت المال).
