إيديهو درقة وسيف

الطيب في شطارته مبدِّع
كتر خيرك الأسد أبشخيرن برَّه
هو لو السمتة من تبَّ ومرق بالفطرة
يا سند التكورك للسند والسترة
يا التلب محل يجن الشدايد بطرا
راجلاً بيتو ضل فوقو القبيلة تقيف
وهو العود الرصين عدل العوج والكيف
حباب جيتو وحباب المنو مارق ضيق
حبابو الفي الدواس إيديهو درقة وسيف
المتلك قليل المتلو مما تبَّ
دراج عاطلة اللزمت ديارو الكبة
يا البلسم دوا الجرح العليو بنكب
سابل عز عقابك ما بتشينو الحبة
الأسد المربعن في الدواس من مدة
راكز في أم لفيخ بالمية ما بتعدَّ
تسلم إت والعاداك يقع وينهدَّ
يجفا النوم وعينيو بالسهر تنقدَّ
يا فارس السيوف الما انكسر شبَّالِن
الدود أبشخير ردَّ الصروف وسعالِن
لزَّام التقايل والمحن فعَّالِن
دُخْر أمَّاتك المن قمت ساتر حالِن
التيس الغضبتو تهد أسود الغابة
إيديو في الشدايد للسهام نشَّابة
التِلِبْ العليو نميت وجيت اتشابَى
جودو قصاد غنوتي ضبحا واتعشابا
قريح كبدة الوجع المصاقر جوفي
لحاق فزعتي ومُقنع محايني وخوفي
الجنى صاقعة المطر التهد ملتوفي
دنكلي نمو وابقي قدر غناو آحروفي
وهيلك يا أبضراع من قمت قولة الراجل
الصقر البهز جبل الحجار وبساجل
الموت البجز رقاب عدو وبي عاجل
الما بحدِّدَن دايرة شجاعتو بَراجِل