دراما خريفيّة .. بطولة المحليّة!! (2)

– 1 –
– بسم الله الرحمن الرحيم.. نبدأ الاجتماع بكلمة السيد المسؤول الكبير في المحليّة..
{ طيب يا أخوانا.. أولاً أنا كمسؤول كبير في المحليّة حأفهّمكم حاجات إنتو ما فاهمنها..
– اتفضّل يا سيادتك.. كلنا (جيوب).. أقصد آذان صاغية!!
{ أولاً.. الناس شايفها متضايقة من مسألة الأضرار العملتها المطرة دي.. لكن في رأيي المسألة ليها تلاتة فوائد.. أولاً.. مُش نحن مفروض نعلم أولادنا السباحة؟! طيّب.. أولاد المساكين ديل يلقوا أحواض سباحة وين؟! أنحنا قلنا ندّي المطرة فرصة تشاركنا في تربية أولادنا!!
والفائدة الثانية للناس الكبار.. لأنهم كسلانين وقاعدين يهملوا تطوير بيوتهم.. فالمطرة لمّن تكسّر لواحد منهم البيت حيضطر يبنيهو من جديد.. وحيكون بصورة أفضل.. وكدا نكون طوّرناهو وطوّرنا المحليّة في (مظهرها الحضاري)!!
– يا سلام.. كلام تمام.. والفائدة الثالثة؟!
{ أنحنا مش في في رمضان؟!
– أيوه..
{ طيب!! الصيام دا مُش أجرو بكون أكبر لو بذلت جهد أكبر!! هسّي الناس من الصباح يغرفوا ويصلحوا لمّن عينهم تطلع.. وبيتعبوا شديد.. وكدا نضاعف ليهم الأجر..
– والله يا سيادتك ما عارفين من غيرك كنا عنعمل شنو؟!
{ بعدين في فايدة رابعة.. ودي خاصة بـ (موارد المحليّة).. بس ما بقدر أكلمكم عنها هسي!!
– مفهوم.. مفهوم!!
– 2 –
{ يا وليّة..
– حمد لله على السلامة يا حاج.. دا شنو الشايلو في إيدك دا؟!
{ دا دواء ملاريا.. لي وللأولاد!!
– بسم الله الرحمن الرحيم.. الملاريا جاتك متين؟! بعدين الأولاد ديل مافي واحد منهم شكا لي.. ضربوا ليك تلفون وللا شنو؟
{ أبداً.. لكنك كالعادة نظرك قصير!! إنتي ما شايفة الموية المحاوطانا دي.. يعني حتسكن فيها الثعابين؟! كلها يوم يومين والبعوض ما يدّيك الدرب!!
– هيْ.. لكن ما ناس المحلية يمكن (…..)!!
{ هس.. أوزعك تتمّيها.. أنا أمبارح قلت ليك شنو؟! والله تاني تجيبي لي سيرة المحليّة أطلقك وأخليك تخُوجي لحدّي بيت ناس أبوك!!
شوف بالله المره النكديّة دي.. أقول ليها موية المطرة والبعوض.. تقول لي المحلية!!
– 3 –
{ دادي.. دادي..
– أيوه يا ولد.. في شنو؟! بعدين مالك نايم لحدّي الساعة أربعة عصر؟!
{ ما هسّي كنت حأقول ليك.. أمبارح بالليل لحدّي الساعة اتنين صباحاً كنت قاعد ألعب مع “ميدو” صاحبي بالعربية.. أرشو ويرشني.. غايتو موية المطرة الفي الشارع دي جميلة بشكل!!
– أقعد ألعب ألعب.. لمن تعمل ليك حادث!!
{ لا لا.. ما بعمل حادث.. لكن أنا زعلان منك؟!
– ليه..
{ إنتا لحدّي الآن ما غيرتا لي العربيّة!!
– مافي مشكلة.. أنا هسّي في إجازة وماشي العمرة.. لمن أرجع الوزارة بشتريها ليك..
{ ثانك يو دادي.. آي لف يو!!